Administratës Biden thirrje të shtyjë afatin për tërheqje të trupave nga Afganistani

Një raport i ri i Kongresit, i ka bërë thirrje administratës së presidentit amerikan, Joe Biden që të mos ketë majin si afat të fundit për tërheqje të trupave të mbetura ushtarake në Afganistan.

Në raportin e publikuar më 3 shkurt, Grupi për Studim të Afganistanit ka rekomanduar mbajtjen e trupave amerikane në këtë shtet, në mënyrë që t’i japë procesit kohë të mjaftueshme për të prodhuar rezultat të pranueshëm.

Grupi për Studim të Afganistanit është panel që funksionon në kuadër të Institutit të Paqes në Shtetet e Bashkuara.

Në raport, paneli ka thënë se Shtetet e Bashkuara kanë interes të madh që Afganistani të mos kthehet sërish në strehë të sigurt për terroristët.

Sipas marrëveshjes së shkurtit të vitit të kaluar, të nënshkruar nga Shtetet e Bashkura bashkë me talibanët, Washingtoni është zotuar për të reduktuar në zero numrin e trupave që ka në Afganistan deri në maj të vitit 2021.

Ish-presidenti amerikan, Donald Trump, që ka bërë fushatë më 2016 për t’iu dhënë fund luftërave qesharake dhe pafund në Lindje të Mesme, tentoi të përshpejtonte procesin e zvogëlimit të trupave në muajin nëntor.

Pentagoni tha më 28 janar se tërheqja e trupave amerikane në Afganistan do të jetë në përputhje me përkushtimet e bëra nga talibanët për të zbatuar marrëveshjen e arritur më 2020.

“Talibanët nuk kanë jetësuar përkushtimet e tyre,” tha Sekretari për media i Pentagonit, John Kirby, duke shtuar se Sekretari amerikan i Mbrotjes, Lloyd Austin, është duke rishikuar këtë çështje dhe ka diskutuar për të ardhmen në këtë shtet bashkë me aleatët e NATO-s.

Në raportin e publikuar më 3 shkurt, raporton RFE, paneli ka bërë thirrje edhe për mbështetje amerikane në institucionet afgane, duke përfshirë institucionet e sigurisë, “ndërkohë që vazhdon të ekzistojë mesazhi ndaj partnerëve afganë se mbështetja amerikane nuk është e pafundme dhe se varet nga përparimi që bëhet në bisedimet për paqe”.