Agjencisë Kadastrale: Qeveria e Kosovës: Manastirit të Deçanit t’i jepen pronat sipas vendimit të Kushtetueses
Qeveria e Kosovës ka kërkuar nga Agjencia Kadastrale që të zbatojë vendimin e Gjykatës Kushtetuese për njohjen e 24 hektarëve pronë të Manastirit të Deçanit. Këtë vendim, tha sot Kryeministri Albin Kurti në mbledhjen e qeverisë e ka marrë për ta hequr si kusht për pranimin e Kosovës në Këshillin e Evropës.
Duke cituar raportin e Komisionit të KiE-së, ku janë renditur disa nga kërkesat për zbatim nga ana e institucioneve të Kosovës, Albin Kurti tha se disa kushte për anëtarësim janë plotësuar e disa janë hequr, por njëra nga ato kushte, Manastiri i Deçanit ka mbetur si kusht i domosdoshëm.
“Qeverisë i është bërë e qartë nga Komiteti i Asamblesë Parlamentare, si dhe nga shtetet e Quintit, që ne duhet të zgjedhim ndërmjet dy opsioneve: Të zbatojmë vendimin e Gjykatës Kushtetuese e të ecim tutje në anëtarësimi në KiE apo heqjen e Kosovës nga anëtarësimi,” tha Kryeministri Kurti duke shtuar se si qeveri nuk ka mjete legale për ta anuluar vendimin e Gjykatës Kushtetuese ndërsa anëtarësimi i Kosovës në KiE do të ishte fitore historike.
“Për të arritur një qëllim shumë më madhor që ia kemi borxh shtetit e që hap mundësi të papara më herët ne duhet të bëjmë një hap përpara me maturi e përgjegjësi si një vend i pavarur e sovran. Andaj, sot i kemi thënë Agjencionit Kadastral të Kosovës që ta zbatojë vendimin e Gjykatës Kushtetuese, kurse ministrja e Punëve të Jashtme dhe e Diasporës, Donika Gërvalla-Shvarc, i ka dërguar notë verbale njoftuese për këtë çështje Këshillit të Evropës,”
Kurti: Të merren masa për agresionin e Serbisë kundër Kosovës
Në mbledhjen e Qeverisë së Kosovës, sot u diskutua edhe për çështjen e sigurisë në vend, ku përmendi kriminelin serb të kërkuar edhe nga Interpoli, Milan Radoiçiç, për të cilin, Kryeministri Albin Kurti tha se ende është i lirë në Serbi e i mbështetur nga institucionet serbe.
“Që nga 24 shtatori ne kemi kërkuar që të merren masa për agresionin e Serbisë kundër Kosovës. Kemi kërkuar ekstradimin e terroristëve që vranë rreshterin, heroin e Kosovës,Afrim Bunjakun,” tha Kryeministri Albin Kurti në mbledhjen e Qeverisë duke vënë në dukje se Serbia, megjithatë, nuk është ndëshkuar megjithë përfshirjen e saj në sulmin terrorist në Banjskë të Zveçanit.
Duke konstatuar se Kosova po dëshmon progresin më të madh demokratik në rajon, Albin Kurti tha se Qeveria e Kosovës nuk ka alternativë tjetër pos rreshtimit të palëkundur drejt aleancës transatlantike ndërsa përfundoi:
“Si qeveri e si popull, si orientim angazhohemi përherë për të shtrënguar e avancuar lidhjet e forta e të veçanta me SHBA-në, Gjermaninë, Mbretërinë e Bashkuar, Italinë, Francën.”
