Agjentët rus/ Podgoricë, Shishmakov dënohet me 15 ndërsa Popov me 12 vjet burg

Nën masa të rrepta sigurie, sot Gjykata e Lartë në Podgoricë ka dhënë vendimin për të akuzuarit që organizuan akte terroriste në ditën e Zgjedhjeve Parlamentare në Mal të Zi, në tetorin e vitit 2016.

Kryetarja e trupit gjykues, Suzana Mugosha, pranë Gjykatës së Lartë në Podgoricë tha se  të gjithë të akuzuarit për akte terroriste në tentativë janë fajtorë, raporton Televizioni publik i Malit Zi, RTCG.

Liderët proserb të Frontit Demokratik, DF, Andrija Mandiç dhe Milan Knezheviç u dënuan me nga 5 vjet heqje lirie, por të dënuarit nuk ishin në sallën e gjyqit.

Shoferi i DF, Mihail Çagjenoviç u dënua me 1 vit e 6 muaj burg.

Dënimi më i rëndë për akte terroriste në tentativë në ditën e Zgjedhjeve Parlamentare 2016, ishte rezervuar për Agjentët e shërbimit sekret rus, Eduard Shishmakov dhe Vladimir Popov, me 15 përkatësisht 12 vjet burg.

Ata u dënuan për veprat penale të krijimit të organizatës kriminale dhe akte terroriste në tentativë.

”Çdo anëtar i organizatës kriminale kishte të paracaktuar detyrën e tij dhe rolin në aktin terrorist, e në veprimtarinë e organizatës kriminale  ekzistonte gatishmëria për përdorimin e dhunës dhe frikësimin, ku që të gjithë ishin të vetëdijshëm për aktin e vet dhe realizimin e tij, dhe ishin të ndërgjegjshëm se akti i tyre është i kundërligjshëm,” tha Mugosha duke vendosur:

“Eduard Shishmakov dënohet 15 vjet burg, Vladimir Popov -12 vjet, Dikiç Bratislav – 8 vjet, Bogiçeviç Predrag- 7 vjet, Ristiç Nemanja – 5 vjet,  Miliç Branka – 3 vjet, Dushiç Milan- 1 vjet e 6 muaj, Maksiç Dragan –  1 vjet e 9 muaj, Çagjenoviç Mihailo –  1 vjet e 6 muaj, Mandiç Andrija – 5 vjet dhe Knezheviç Milan – 5 vjet burg,”  thekso kryetarja e trupit gjykues, Suzana Mugosha, ndërsa e akuzuara Kristina Hristiç është dënuar 1 vjet me kusht.

Ndryshe, seanca përfundimtare pranë Gjykatës së Lartë në Podgoricë ku u dha dënimi për grupin terrorist të kryesuar nga dy Agjentët rus, Eduard Shishmakov dhe Vladimr Popov të cilët në ditën e Zgjedhjeve Parlamentare 2016 në Mal të Zi kishin vendosur që ta sulmojnë Parlamentin e Malit të Zi dhe të vrasin liderin e njohur malazez dhe kryetarin e DPS, Milo Gjukanoviç, përveç se  u zhvillua nën masa të rrepta sigurie, për këtë seancë përkatësisht vendimet e saj, kishte një interesim të jashtëzakonshëm mediatik si vendor ashtu edhe ndërkombëtar.