Agjentët turq të MIT arrestojnë dhe riatdhesojnë nipin e Gulenit

Agjentët e Organizatës Kombëtare të Inteligjencës së Turqisë, MIT, kanë arrestuar dhe riatdhesuar nipin e Fethullah Gulen, kundërshtarit të presidentit të Turqisë, Recep Tayyip Erdogan.

Ankaraja zyrtare e akuzon, Fethullah Gulen, predikuesin mysliman i cili jeton në SHBA, për organizimin e përpjekjes për grusht shtet më 2016, që la qindra të vdekur dhe mijëra të tjerë të plagosur.

Që nga viti 2016, Turqia ka arrestuar dhjetëra mijëra njerëz që dyshohet se kanë lidhje me Gulenin. Duke cituar burime brenda organeve të sigurisë, Agjencia shtetërore e lajmeve Anadolu, njoftoi se Selahaddin Gulen u soll në Turqi nga agjentët e inteligjencës turke.

Nuk është bërë e ditur se në cilin vend është arrestuar ai.

Agjencia publikoi një fotografi të të dyshuarit me pranga në duar. Anash tij ishin vendosur dy flamuj të Turqisë. Raportet nuk ofruan informacione nëse operacioni i agjentëve të inteligjencës ishte bërë në marrëveshje me vendin ku është arrestuar nipi i Gulenit.

Selahaddin Gulen, raporton RFE, akuzohet se i përket “organizatës terroriste FETO”, përshkrim i përdorur nga Ankaraja zyrtare për lëvizjen e Fethullah Gulen.

Gulen, i cili jeton në Pensillvani të SHBA-së, këmbëngul se udhëheq një rrjet paqësor të bamirësive dhe kompanive dhe mohon çdo lidhje me përpjekjen për grusht shteti më 2016.

Erdogan dhe Gulen dikur kanë qenë aleat ndërsa sot, Erdogan thotë se Gulen është udhëheqës i një grupi “terrorist” i cili synon të rrëzojë qeverinë turke.

Që prej grushtit të shtetit të dështuar më 2016, Turqia ka “riatdhesuar” dhjetëra njerëz të akuzuar se i përkisnin rrjetit të Gulen, veçanërisht në Ballkan dhe Afrikë.

Rrëmbimi i gjashtë shtetasve turq në Kosovë, nga agjentët turq, më 2018 nxiti një krizë politike në vendin e Ballkanit, duke çuar në shkarkimin e ministrit të Brendshëm dhe shefit të inteligjencës.

Në Turqi, që nga viti 2016, më shumë se 140,000 punonjës të sektorit publik, përfshirë mësuesit dhe gjyqtarët gjithashtu janë shkarkuar ose pezulluar për lidhje të dyshuara me Gulenin.