Agron Tufa kundër Spartak Brahos, gjykata pushon çështjen. Ja arsyeja…

Gjykata e Tiranës ka vendosur të pushojë çështjen e ngritur nga Ish-Drejtori i Institutit të Studimeve të Krimeve dhe Pasojave të Komunizmit, Agron Tufa, i cili akuzoi deputetin e PS-së, Spartak Braho.

Trupi gjykues i kryesuar nga gjyqtari Sokol Pasho, vendosi të pushojë vlerësoi se kërkesa e ngritur nga Agron Tufa nuk përmbush kriteret ligjore në kuptim të legjitimimit aktiv të kërkuesit dhe nuk mund të merret në shqyrtim prej kësaj Gjykate, ndaj edhe çështja duhet të pushohet.

Ndryshe, Spartak Braho u padit nga Ish-Drejtori i Institutit të Studimeve të Krimeve të Komunizmit, ISKK, Agron Tufa për fyerje e shpifje, ndërsa kërkoi nga deputeti socialist shumën prej 250.000 lekë si dëmshpërblim.

Kundër këtij vendimi mund të bëhet ankimimi brenda 15 ditëve në Gjykatën e Apelit Tiranë.

Gjykata, bazuara në nenet 59, 60, e 387 të Kodit Pr.Penale

VENDOSI

Pushimin e çështjes penale nr.107 akti datë 05.12.2019 me viktimë akuzuese Agron Tufa dhe të akuzuar Spartak Braho, me objekt fajtor i të akuzuarit për veprën penale “Fyerja” dhe ‘Shpifja”, të parashikuara nga nenet 119 e 120 të K. Penal si dhe “Shpërblimi i dëmit’, në shumën 250.000 lekë.

Shpenzimet procedurale siç janë bërë.

Kundër këtij vendimi mund të ankimohet në Gjykatën e Apelit Tiranë brenda 15 ditëve”, thuhet në vendimin e Gjyqtarit Sokol Pasho.

Argumenti

Gjykata e Tiranës konstaton se prokura e lëshuar nga Agron Tufa për avokatin e tij nuk është në përputhje me kërkesat e ligjit.

“ Prokura e datës 18.04.2019 e lëshuar prej Agron Tufës nuk përmban një tagër të tillë. Për më tepër, Gjykata konstaton se data e lëshimit të kësaj prokure (18.04.2019) është e mëparshme në kohë se fakti penal i pretenduar prej viktimës akuzuese (04.12.2019) dhe në këtë kuptim ka qenë në pamundësi objektive për t’i dhënë avokatit tagra të posaçme përfaqësimi për një fakt që nuk kishte ndodhur ende në kohën e lëshimit të kësaj prokure”, thekson Gjykata në argumentet e saj.