Agron Tufa në Parlament/ Celulë e Ballit, Braho: Hileqarë keni qenë që në luftë ashtu jeni dhe tani!
Deputeti socialist Spartak Braho edhe nga foltorja e Parlamentit ka përsëritur akuzën e bëra në Komisionin e Sigurisë ndaj Drejtorit të Institutit të Studimit të Krimeve të Komunizmit, Agron Tufa, se e ka kthyer institutin në celulë të Ballit Kombëtar.
Duke mos harruar luftën e klasave, Braho I tha “ballistit” Agron Tufa se hileqarë ka qenë që në luftë ashtu është dhe tani në demokraci ndërsa i kërkoi që të lërë detyrën si i papërshtatshëm.
“Deri më sot asnjë nuk e dinte që ekzistonte ky Institut, i miratuar nga mazhoranca e Sali Berishës në 2010. Po meqë është mirë bëhet dhe jam plotësisht dakord të ekzistojë. Kjo situatë e këtij debati u krijua gjatë disa ditëve më parë gjatë shqyrtimit të një rezolute në komisionin e ligjeve. Ky institut drejtohet nga një letrar që ka mbaruar për letërsi në ish-Bashkimin Sovjetik. Dua t’i them këto fjalë pasi më erdhi në mend një debat që më ka ngacmuar tërë kohën që ky studiues hidhte baltë dhe kërkonte heqjen nga qarkullimi të filmave dhe letërsisë para viteve ‘90. Me pak fjalë duhej zeroruar çdo gjë dhe Kadareja, Agolli, Korreshi veçanërisht ato që përshkruanin ngjarje të luftës antifashiste.”
Një tezë absurde që u prit keq edhe nga opinioni, vlerësoi Braho, dhe duke e quajtur “baltosje” publikimin e së vërtetës për LNÇ-në, deputeti socialist tha se nga disa botime të këtij Instituti, në njërën prej tyre, hidhej baltë në luftën antifashiste dhe quheshin kriminelë drejtuesit e kësaj lufte, ku më qesharak ishte ai që bënte fjalë për Ballin Kombëtarë:
“Unë gjykoj se Instituti ka shkelur ligjin, “larg duart nga vitet 41-45’” tha kryeministri, sepse neofashistët e tipit Tufa e Çela, kërkojnë glorifikimin e bashkëpunëtorëve të fashizmit dhe nazizmit.
Po ju them se e keni kthyer institutin në celulë të Ballit Kombëtarë, jo vetëm se jeni mbledhur aty me kokrra, po luani me zjarrin duke shkelur ligjin dhe shpërdoruar luftën antifashiste nacional çlirimtare, të cilën nuk e bëtë ju dhe soji juaj, as Milladin Popviçi dhe Dushan Mugosha siç shpreheni vetë. Luftën e bënë bijtë e këtij vendi, edhe ata ballistë që pas 24 majit u rreshtuan tek partizanët, si dhe koalicioni antifashist, sovjeto anglo-amerikan. Ngule në tru se lufta ishte patriotike dhe çlirimtare,” tha duke kërcënuar Spartak Braho duek iu drejtuar Agron Tufës dhe duke përkufizuar që në foltoren e Parlamentit se kush është kriminel e kush tradhëtar, dhe që sipas tij ka vetëm një çlirimtar:
“Nuk ishin kriminelë Spiro Mojsiu, Memo Meto, Rrahman Parllaku, Haxhi Lleshi, Myslym Peza, Nazmi Rushiti, Met Hasa, Persefoni Kokëdhima e mijëra të tjerë.
Ngule në tru këtë punë, lufta antifashiste ishte luftë çlirimtare. Keni shkelur ligjin me tendencë. Hileqarë keni qenë që në luftë ashtu jeni dhe tani në demokraci.”
Duke mos njohur as aktin e themelimit të Institutit që drejton Agron Tufa si dhe Statutin e tij, Spartak Braho ngatërron rolin që ka Parlamenti ndaj këtij institucioni:
“Përse gërmoni në arkivat për të kërkuar dokumentacion të deklasifikuar? Kush ua lejon që dërgoni dhe shkesa në institucion? Që të punosh në një institucion dhe të shpërdorosh materialet arkivore, ju nevojitet çertifikatë sigurie. Ju për shkelje të rënda të ligjit, duhet të planifikoni të kontrolloheni nga Drejtoria e monitorimitt të Kuvendit dhe mendoj që detyrën si Drejtor ekzekutiv ta lini si i papërshtatshëm,” tha në fund Spartak Braho ndonëse nuk ishte e qartë nëse do ta mbyllte gojën me këtë largim meqë Agron Tufa edhe me këtë rast nuk do të konvertohej në komunist.
