Agroni!
nga Agim Popoci
Pas numërimit të votave në vend, analiza e rezultatit të zgjedhjeve veçoi dy fenomene që karakterizuan zgjedhjet e 11 majit: Humbjen e 140.050 votave të Partisë Demokratike nga zgjedhjet e kaluara në vitin 2021 ndërsa partitë e dala nga PD që veten e quajnë përveç se të reja edhe të djathta morën vetëm 68.159 vota, dhe, fenomeni “Agron Shehaj”!
Për të kuptuar atë se çfarë ndodhi më 11 Maj, mjafton vetëm prekja e fenomenit “Agron Shehaj” edhe pse ai vetë thotë se votat nuk janë vjedhur, dhe del zbuluar edhe strategjia e qëndisjes së fitores nga Edi Rama!
Fenomeni i shpikur mediatik “Agron Shehaj” i cili po konsiderohet nga të gjitha mediat nën kontrollin e Edi Ramës si sukses i zgjedhjeve të 11 Majit, pasi me partinë e tij të re “Mundësia” arriti të marrë 49.001 vota dhe 2 mandate deputeti, bazuar në prezantimin e tij si biznesmen para se të shfaqej si politikan, dhe lojën në terrenin politik, si dhe zhvillimet postzgjedhore, rezulton si dështimi më i madh i këtyre zgjedhjeve!
Në fillim duhet thënë se Agroni u fut në këto zgjedhje me kredite shumë të mëdha që nuk i kishte asnjë lider partie, si dhe hapësirë të konsiderueshme mediatike që Bashaj, Lapaj, Dashi e Qori vetëm mund ta ëndërronin, por çuditërisht prezenca e madhe në media i bëri dhe dëmin më të madh!
Artikulimi si biznesmen në media dhe shfaqja në fushatë zgjedhore që fillonte nga selia e partisë në Pallat Mbretëror dhe lëvizja me autobus special, pa një Plan Biznesi, dështimi i partisë në vendlindje dhe marrja e vetëm dy mandateve, dëshmuan vetëm paaftësi; Ndërsa shfaqja në një qendër numërimi për të mbrojtur votën e partisë “Mundësia”, tregoi se nuk është as biznesmen!
Fleta e votimit me ngjyrë ndryshe që ishte identifikuar nga numëruesja dhe shihej edhe me sy të lirë, revoltoi shumë liderin e partisë “Mundësia”, i cili sapo u shfaq në arenë kërkoi krahasimin me fletët tjera dhe zbuloi se edhe një votë e partisë së Tom Doshit kishte ngjyrë të zbehtë, dhe kërkoi sqarime se pse edhe ajo nuk është shpallur e pavlefshme!
Sikur Agroni të ishte biznesmen dhe t’ia dinte vlerën kartëmonedhës, ai do të reagonte për fletën e votimit që ishte ndryshe sepse nuk plotësonte njërën ndër kriteret e saj të sigurisë që i ka dhe kartëmonedha, ngjyra e fletës!
Por, jo, ai nuk reagoi si një biznesmen me ndjeshmëri të kartëmonedhës origjinale, që të kërkoi llogari dhe hetim të të gjitha fletëve që nuk plotësojnë atë kriter sigurie që tani ishte i dukshëm, ngjyrën, por filloi të ngritë zërin pse vota ishte shpallur e pavlefshme kur ende nuk kishte asnjë vendim!
Mediat në shërbim të Edi Ramës iu vërsulën zërit të Agronit, Vendimi u mor, dhe ky lider i madh i partisë “Mundësia”, shpëtoi votën!
Po, po, shpëtoi votën pa e kuptuar se çfarë është fleta e votimit dhe vota, gjë që do të tregoi dhe rezultati përfundimtar!
Me përfundimin e numërimit të votave në vend, të gjitha mediat njëzëri filluan të flasin për Agron Shehajn e djathtë, që nga gjiri i Partisë Demokratike shkëputi 43.076 dhe dy mandate ndërkohë që ky numërim kishte tregues që e bënin të turpërohej dhe jo të mburrej Agroni!
Nëse në lojën politike kishte diçka me vlerë Agroni ishte rreshtimi në krah të Sali Berishës me Rithemelimin e Partisë Demokratike, por që ai e zhvlerësoj me largimin nga kjo parti dhe krijimin e partisë së re “Mundësia”!
Sërish duhet ti kthehemi mungesës së Planit të Biznesit! Sikur ta kishte një të tillë, dy mandate do ta çonin në negociata me liderin e PD, Sali Berisha, dhe duke njohur dhe vlerën që ka tashmë zotëruesi i mandatit të dytë të Agronit, studiuesi i njohur Erald Kapri, lideri demokrat do t’ia dhuronte me kënaqësi të gjitha privilegjet e kërkuara nga deputeti në ikje!
Por, jo, “biznesmeni” nuk e ka llogaritur koston e krijimit të një partie të re, e aq më pak, respektin për investimin që kishte bërë nga trazirat e 8 Janarit 2022 kur dhe filloi të konsiderohej demokrat i linjës së fortë, ndryshe do të mendonte për mundësinë e ardhjes në krye të PD, pavarësisht rezultatit të 11 Majit!
Dhe jo vetëm kaq! Nuk e ka llogaritur as faktin se me numërimin e votave dhe shpalljen e rezultateve nuk do të rezultoi as parti e djathtë pavarësisht investimit me promovimin e figurave të rëndësishme historike shqiptare si Mit’hat Frashëri!
Alergjik në shifra ndonëse biznesmen, Agroni filloi të mburret me 49.001 votat e fituara duke harruar se rezultati lexohet edhe nga ata që janë vërtetë të djathtë, dhe shohin se personi më i votuar është njeriu që Edi Rama e takoi gjatë përgatitjeve të Samitit të Komunitetit Politik Europian.
Askush nuk mund ta vë në dyshim se artisti Edison Abazi mund të merrte 4.833 vota sikur edhe mos ta takonte fare Edi Ramën, por kjo është politika ndonëse ai u mundua ta sqaroi opinionin; Sepse, e sigurtë është se politikani Agron Shehaj sikur të renditej në anën e lulushëve, gazsjellësit dhe shkopit të bejsbollit për demokrat, nuk do të mund të fliste as për etikë, as për bindje të djathta dhe as si demokratë, dhe sot, në rastin më të mirë do të kishte vota aq sa ka lideri euroatlantik, 1.529 vota!
Absurditeti tjetër i kësaj partie të një biznesmeni pa Plan Biznesi është se personi i dytë më i votuar që kalon shifrën 1.000 është vetëm edhe një kandidat, Sidorela Dervishi, 1.511 vota!
Pra, krijon një parti, shpenzon miliona euro, për t’ia shkëputur Partisë Demokratike dhjetëra mijëra vota, dhe, i fituari i vetëm rezulton Edi Rama!
Nëse kësaj i shtojmë dhe epilogun e numërimit të votave ku më e votuara në listën e hapur të PD rezultoi me 20.565 vota Jordia Tabaku e kuruar me shumë sforco nga 8 janari, ku pa konkurrencë do të ishte Agron Shehaj sikur mos të largohej nga kjo parti dhe si lab do ta siguronte Eraldin në listë të mbyllur, sot, mund të flitej edhe për Agronin si lider i ardhshëm i Partisë Demkratike!
Por, fatkeqësisht, duke mos u bërë dot biznesmen si të gjithë zengjinët e tranzicionit, politikan jo se jo kur shoqërohesh me fevzi e buzhalë, Agroni nuk del vetëm një fiasko i propagandës së Partisë Socialiste, por, një fenomen të cilin aktualisht po e tundin mediat e Edi Ramës, vetëm për të realizuar planin strategjik të Sigurimit të Shtetit, largimin e Sali Berishës nga politika!
