Ahmeti: Bashkëpunimi i lidershipit shqiptar ka përmirësuar pozitën e shqiptarëve në Maqedoni
Bashkëpunimi i lidershipit shqiptar ka përmirësuar pozitën e shqiptarëve në Maqedoni. Kështu u shpreh kryetari i Bashkimit Demokratik për Integrim të Maqedonisë, Ali Ahmeti, gjatë vizitës zyrtare në Kosovë ku u takua me krerët shtetërorë, ku diskutuar bashkëpunimin ndërmjet Kosovës e Maqedonisë dhe rëndësia e integrimit euroatlantik të dy vendeve .
“Është shumë e rëndësishme që të ecim përpara si rajon, sepse vetëm kështu e forcojmë paqen dhe stabilitetin në tërë Ballkanin Perëndimor”, u shpreh presidenti Thaçi pas takimit me Ahmetin, duke shtuar se Kosova i përkrah përpjekjet për zgjidhjen e kontestit rreth emrit të Maqedonisë.
“Zgjidhja e kontestit të emrit e rrjedhimisht edhe hyrja e Maqedonisë në NATO është në interes të paqes në tërë rajonin tonë”, tha presidenti Thaçi.
Presidenti Thaçi dhe kryetari Ahmeti kanë folur edhe për rëndësinë e autostradës Prishtinë-Shkup, e cila do t’i afrojë edhe më shumë qytetarët tanë me njëri-tjetrin.
“Me Ali Ahmetin u pajtuam që, përveç Autostradës ‘Arbën Xhaferi’, e cila do lehtësojë komunikimin mes dy vendeve, duhet të punojmë edhe në projekte të tjera që rrisin mirëqenien e qytetarëve tanë e po ashtu përshpejtojnë rrugën tonë drejt Bashkimit Evropian”, u shpreh Veseli pas takimit me Ali Ahmetin.
Kreu i BDI-së u takua edhe me kryeministrin Ramush Haradinaj. Ky i fundit tha se me Ahmetin janë dakorduar që të angazhohen bashkërisht “që t’u gjejmë zgjidhje shumë çështjeve të rëndësishme, të cilat presin prej kohësh”.
“Raportet e mira ndërfqinjësore, janë garanci e paqes në rajon”, u shpreh Haradinaj.
