AKI, të kthyerit nga Siria nuk paraqesin rrezik!
Drejtori i Agjencisë së Kosovës për Inteligjencë, AKI, Shpend Maxhuni është shprehur se 110 personat e kthyer në Kosovë nga Siria nuk paraqesin rrezik serioz për vendin.
Shpend Maxhuni i ka bërë këto komente gjatë raportimit të tij, para Komisionit Parlamentar për Mbikëqyrjen e Punës së AKI-së.
Kryetari i këtij Komisioni, Faton Topalli, tha se në bazë të të dhënave që ka prezantuar drejtori i AKI-së, Shpend Maxhuni, të kthyerit kryesisht gratë dhe fëmijët kanë qenë viktima në këtë konflikt.
“Sipas informacioneve që kemi ne, personat e kthyer janë profilizuar saktësisht dhe ekzistojnë informacionet e nevojshme për ta dhe nuk ka ndonjë rrezik akut për sigurinë e Republikës së Kosovës. Një, për faktin që shumica prej tyre janë viktima, shumica e grave janë viktima, fëmijët janë viktima në këtë konflikt. Prandaj nuk ka rrezik të rëndë për Republikën e Kosovës dhe nuk ka as informacione se mund të ndodh diçka edhe pse kurrë nuk përjashtohet, por rrezikshmëria që është përcaktuar nga AKI-ja nuk ka ndonjë rrezik,” tha Topalli duke shtuar se 110 personat janë kthyer në Kosovë me pëlqimin e tyre.
Sipas informacioneve të AKI-së, besohet se 93 shtetas kosovarë kanë humbur jetën që nga fillimi i konfliktit të Sirisë duke përfshirë luftëtarë, gra dhe fëmijë.
Një ditë pas kthimit të 110 kosovarëve, Drejtori i policisë së Kosovës, Rashit Qalaj dhe ministri i drejtësisë, Abelard Tahiri, pohuan se në Siri ende mbesin rreth 90 kosovarë për të cilët nuk u bë e ditur nëse do të ketë operacion të kthimit.
Mirëpo, kryetari i Komisionit për mbikëqyrjen e AKI-së, Faton Topalli thotë se sipas informacioneve të AKI-së, aktualisht numri i kosovarëve që ndodhën në Siri është 65 dhe se institucionet e sigurisë janë duke punuar për kthimin në Kosovë edhe për qytetarët e tjerë të mbetur në Siri shumica prej të cilëve gjenden në kampe apo janë të burgosur.
“Janë duke u mbledhur informacionet e nevojshme. Një pjesë e tyre ndodhen në kampe ose janë të arrestuar atje. Institucionet e Kosovës janë duke vazhduar punën e tyre edhe AKI-ja për riatdhesimin e tyre në Kosovë. Pra me këta 110 kosovarët që janë kthyer nuk ka përfundua kjo çështje”, tha Topalli.
Ndryshe, natën e 19 prillit, institucionet kosovare kthyen nga Siria në Kosovë katër luftëtarë, 32 gra dhe 74 fëmijë. Kosova u bë ndër vendet e para në botë që ktheu në mënyrë të organizuar qytetarët e saj nga zonat e konfliktit në Siri.
Ditën e kthimit të tyre në Kosovë, ministri i drejtësisë, Abelard Tahiri tha se shumica e grave dhe fëmijëve ishin viktima të mashtrimit dhe se meritojnë të riintegrohen në shoqëri.
Pas kthimit në Kosovë, policia arrestoi menjëherë katër luftëtarët e huaj të cilët ishin në mesin e grave dhe fëmijëve, ndërsa ndaj 32 grave rifilluan hetimet për bashkim apo pjesëmarrje në organizata terroriste. Që të gjitha grave iu është caktuar masa e arrestit shtëpiak deri në një vendim tjetër të gjykatës.
