Akil Gjakova, medalje e artë në Kampionatin Evropianin në Hungari

Xhudisti kosovar, Akil Gjakova, ka fituar medaljen e artë në Kampionatin Evropianin U23 që po mbahet në Gyor të Hungarisë.

Pasi mposhti në gjysmëfinale me një IPPON rumunin Marcel Cercea, kosovari kaloi në finale duke mposhtur po ashtu me IPPON xhudistin nga Azerbajxhani, Rufat Mammadov. Kjo është medalja e dytë e Gjakovës brenda pak ditësh.

Në finalen e kategorisë deri në 73 kilogramë Gjakova e mposhti xhudistin nga Azerbajxhani me Ippon.

Xhudisti nga Peja kështu fitoi medaljen e artë në Evropianin U23 që po mbahet në Gyor të Hungarisë.

Kjo garë shënon edhe fundin e kampionatit evropian për Gjakovën në garat U23.

Paraprakisht, Akili kishte shënuar edhe katër fitore të tjera, ndërsa raundin e parë e kaloi pa luftë.

Në raundin e dytë mundi serbin Filip Jovanoviq, në të tretin mposhti holandezin, Roy Schipper, në çerekfinale italianin, Gabriele Sulli, kurse në gjysmëfinale rumunin Marcel Cercea

Trajneri i tij Driton Kuka i është gëzuar lajmit duke thënë që nga mëhalla e tij shkohet me Ippon në Finale!

“Me Ippon në finale! Akil Gjakova Kampion Evropian 23!” , ka shkruar Kuka në Facebook.

Kjo medalje vjen pas katër medaljeve të tjera që xhudistët kosovarë fituan në “Grand Slam Abu Dhabi”.

Në këtë garë që u mbajt para disa ditësh, Nora Gjakova e fitoi medaljen e artë, kurse Majlinda Kelmendi, Distria Krasniqi e Akil Gjakova të argjendtën. Përpos medaljeve, ata fituan edhe pikë të theksueshme për normë olimpike.