Aksident ajror në Nepal: 18 të vdekur, piloti shpëton

Tetëmbëdhjetë persona humbën jetën pasi një avion u rrëzua dhe mori flakë, derisa po ngrihej sot nga kryeqyteti i Nepalit, Katmandu.

Piloti, i cili aktualisht po trajtohet në spital, është i vetmi i mbijetuar në aksidentin fatal, raporton RFE.

Nëntëmbëdhjetë persona ishin në fluturimin testues të kompanisë Saurya Airlines, përfshirë anëtarë të stafit teknik të linjës ajrore dhe dy anëtarë të ekuipazhit.

Shkaqet e aksidentit janë duke u hetuar.

Industria e aviacionit e Nepalit është e dobët për nga siguria.

Kjo gjendje u atribuohet disa faktorëve – nga moti i paparashikueshëm deri te rregulloret e dobëta.

Aksidenti i sotëm ndodhi rreth orës 11:15, disa minuta pasi avioni u ngrit nga Aeroporti Ndërkombëtar Tribhuvan, tha Qendra Koordinuese e Kërkim-Shpëtimit e Autoritetit të Aviacionit Civil të Nepalit.

Fluturimi testues i kompanisë Saurya Airlines drejt qytetit Pokhara ishte pjesë e një kontrolli rutinor të mirëmbajtjes, sipas saj.

Shtatëmbëdhjetë nga viktimat, raporton RFE, janë shtetas të Nepalit, ndërsa një është shtetas i Jemenit, i cili punonte si inxhinier.