Aksident i rëndë në Ferizaj, 4 të vdekur dhe 1 i lënduar

Katër të vdekur dhe një i lënduar është bilanci i një aksidenti të rëndë që ka ndodhur në rrugën nacionale Ferizaj-Shtime, në fshatin Koshare.

Policia e Ferizajt ka bërë të ditur se aksidenti ka ndodhur në orën 15:37 dhe aty ishin të përfshira dy automjete. Personi i lënduar është dërguar për trajtim mjekësor në Qendren Klinike Universitare të Kosovës, QKUK, Prishtinë.

“Janë katër persona të vdekur në vendin e ngjarjes ndërsa një grua është dërguar e intubuar për trajtim në Qendren Klinike Universitare të Kosovës. Dy ekipe nga emergjenca kanë shkuar në vendin e ngjarjes,” ka skatësuar Drejtorja e Qendrës Kryesore të Mjekësisë Familjare në Ferizaj, Nadire Ymeri.

Ndërkohë Prokuroria Themelore në Ferizaj ka bërë të ditur se pas aksidentit të trafikut në Koshare të Ferizajt ku kanë humbur jetën katër persona dhe një tjetër është dërguar në QKUK në gjendje të rëndë, një person është ndaluar për 48 orë nën dyshimin se ka kryer veprën penale rrezikimi i trafikut publik.