Aksident i rëndë në rrugën Istog -Pejë/ Haradinaj viziton të lënduarit
Kryeministri i Kosovës, Ramush Haradinaj, i shoqëruar nga ministri i Infrastrukturës, Pal Lekaj dhe Zv/ministri i Shëndetësisë, Ali Berisha, vizitoi në orët e mbrëmjes Spitalin Rajonal të Pejës ku po trajtohen të lënduarit nga aksidenti me autobus në rrugën Istog -Pejë, fshati Jabllanicë e vogël.
Gjatë vizitës, kryeministri Haradinaj duke u uruar shërim të lënduarve në këtë aksident, falënderoi ekipin e mjekëve dhe shërbimin spitalor për kujdesin dhe punën e mirë ndaj pacientëve, duke u shprehur i kënaqur me punën profesionale të stafit mjekësor të Spitalit të Pejës.
“Është me rëndësi për familjet dhe të gjithë ne se nuk ka arsye për shqetësim, pasi asnjëri nga të lënduarit nuk është në rrezik jete. Na vije keq për familjarët, por fatmirësisht kjo është e tejkaluar”, tha kryeministri Haradinaj njofton kumtesa për media.
Nga 24 të aksidentuarit, 11 janë ende duke u trajtuar, ndërsa të tjerët janë liruar në shtëpi.
Detajet e reja të Policisë së Kosovës
Aksidenti ka ndodhur në orës 13:40 në rrugën Istog -Pejë, përkatësisht në fshatin Jabllanicë e vogël ne vendin e quajtur ”Dydesh”. Në këtë aksident ishte i përfshirë një minibus i tipit Iveco me targa vendore.
Të lënduarit janë të gjithë shtetas të Kosovës dhe të gjithë janë duke u trajtuar në spitalin rajonal në Pejë, ku sipas ekipit mjekësor të gjithë të lënduarit janë jashtë rrezikut për jetë.
Sipas të dhënave paraprake dyshohet se aksidenti ka ndodhur derisa ngasësi i minibusit i cili ishte duke qarkulluar nga Istogu në drejtim të Pejës, me të arritur në fshatin Jabllanicë e vogël ne vendin e quajtur ”Dydesh”, duke mos iu përshtatur kushteve të rrugës si dhe shpejtësisë për një moment humb kontrollin mbi automjet dhe godet një pemë në anën e kundërt të rrugës, thekson Policia duke shtuar se Prokurori tashmë po merret me hetimet si dhe ka vizituar të gjithë të lënduarit.
