Aksident në kufirin Serbi-Hungari, humbin jetën shtatë migrantë

Shtatë persona humbën jetën e katër u lënduan pasi një automjet me targa serbe, në të cilën ndodheshin migrantë, u përplas në një shtëpi në Hungari.

Aksidenti ndodhi dje pasi drejtuesi i automjetit refuzoi të ndalet për kontrolle rutinore, njoftoi policia.

Drejtuesi i automjetit vërejti që policia është duke kontrolluar makinat në fshatin, Morahalom afër kufirit me Serbinë dhe tentoi të shmang patrullën, raporton Agjencia e lajmeve Reuters duke ju referuar policisë.

Automjeti në të cilën ndodheshin 10 persona, u nis në drejtim të qytetit Segedin dhe si pasojë e shpejtësisë së madhe, goditi shtëpinë dhe u rrotullua.

Policia njoftoi se drejtuesi, i cili po ashtu u lëndua në aksident, u arrestua dhe ndaj tij do të fillojnë procedurat penale. Ai pritet të akuzohet për tregti me qenie njerëzore dhe shkaktim të aksidentit me fatalitet.

Aksidenti ndodhi afër kufirit të shtetit anëtar të Bashkimit Evropian, Hungarisë me Serbinë, e cila nuk është pjesë e bllokut.

Në vitin 2015, në kulmin e krizës me refugjatë, qeveria e kryeministrit hungarez, Viktor Orban, ndërtoi një rrethojë të lartë, kur mijëra njerëz kalonin pikën kufitare nga Serbia drejt Hungarisë. Javën e shkuar, 2.419 migrantë u ndaluan në kufijtë hungarez, tregojnë të dhënat e policisë.

E ashtuquajtura, Rruga ballkanike, drejt shteteve më të pasura të Bashkimit Evropian vazhdon të shfrytëzohet nga refugjatët dhe migrantët, të cilët i ikin konfliktit, luftës, vështirësive ekonomike apo përndjekjes në vendet e tyre.

Numri i migrantëve, raporton RFE, të cilët hyjnë në Bashkimin Evropian duke kaluar kah shtetet e Ballkanit Perëndimor, pothuajse është dyfishuar gjatë këtij viti, njoftoi në gusht, Agjencia evropiane për kontrollimin e kufijve, Frontex.

Shumica e migrantëve vijnë nga Siria dhe Afganistani.