Aksident në minierën e Martaneshit, MIE: Ja çfarë ndodhi në galeri…
Pas raportimeve mbi rrjedhjen e gazit në galerinë 40 të minierës së Martaneshit, ku për pasojë janë bllokuar disa minatorë ndërsa nga grupet e avari-shpëtimit 6 minatorë janë nxjerrë nga galeria, ku njëri prej tyre është në gjendje të rëndë shëndetësore dhe është nisur me helikopter drejt Tiranës, ka reaguar Ministria e Infrastrukturës dhe e Energjisë, MIE, duke dhënë detaje mbi aksidentin i cili ndodhi këtë pasdite në minierën e Martaneshit.
“Gjatë saldimit në nëntokë të një vagoni mineralesh është çliruar gaz nga gjeneratori i përdorur dhe si rrjedhim mekaniku SH.D., 45 vjeç ka humbur ndjenjat. Pranë tij ka qenë edhe një punonjës tjetër, i cili gjithashtu ka pasur shqetësime,” thekson MIE duke shtuar se mekaniku që ka humbur ndjenjat është dërguar me helikopter në drejtim të Tiranës, për të marrë ndihmën mjekësore ndërkohë punonjësi tjetër është dërguar në spitalin e Bulqizës, ku ndodhet jashtë rrezikut për jetën.
Në galeri, sipas MIE, nuk ka pasur shembje dhe as minatorë, të cilët të jenë bllokuar.
Njoftimi i MIE:
Në datë 11 maj 2021, rreth orës 12:30, në galerinë Nr.1240, Zona e Re Batër, Qarku Dibër, e cila shfrytëzohet nga shoqëria “Xhireton” shpk, me Leje minerare nr. 479/2, ka ndodhur një aksident.
Nga të dhënat paraprake të inspektimit të vendngjarjes, rezulton se gjatë saldimit në nëntokë të një vagoni mineralesh është çliruar gaz nga gjeneratori i përdorur dhe si rrjedhim mekaniku SH.D., 45 vjeç ka humbur ndjenjat. Pranë tij ka qenë edhe një punonjës tjetër, i cili gjithashtu ka pasur shqetësime.
Prezent në vendin e ngjarjes, në një distancë më të largët kanë qenë 3 punonjës të tjerë, të cilët u kanë ardhur në ndihmë kolegëve të tyre, duke e nxjerrë SH.D., jashtë galerisë. Ai është dërguar me helikopter në drejtim të Tiranës, për të marrë ndihmën mjekësore, ndërkohë që punonjësi tjetër është dërguar në spitalin e Bulqizës, ku ndodhet jashtë rrezikut për jetën.
Në galeri nuk ka pasur shembje dhe as minatorë të bllokuar.
Grupet e AKSEM, Inspektorati i Punës dhe Policia e Shtetit janë në vendngjarje dhe po vlerësojnë rrethanat e ngjarjes.
