Aksident tragjik në aksin Fier-Vlorë, shuhet familja Gushi

Një familje është shuar në aksidentin tragjik i cili ndodhi sot në aksin Fier-Vlorë, pranë fshatit Panaja, në zonën e njohur si “Kripa”. Fjala është për familjen Gushi nga Patosi, me katër pjesëtarë: çifti i bashkëshortëve Eduart Gushi dhe Silvana Gushi, dhe dy vajzat e tyre të mitura Anastasia Gushi 14 vjeçe, dhe Eva Gushi, 9 vjeçe.

Viktimat kanë qenë në makinën tip “Toyota” me targa greke, e cila është përplasur fuqishëm nga pas nga një mjet tip “Audi”. Dyshohet se shkak është bërë një parakalim i gabuar i mjetit “Audi”, që ka bërë që mjeti “Toyota” të humbasë kontrollin dhe të përfundojë në një kanal.

Të plagosur kanë mbetur edhe tre persona që udhëtonin me makinën “Audi”, Igli Madani, Fabio Lamaj dhe Glori Selimi, të cilët janë transportuar në spital.

Si pasojë e përplasjes është shkatërruar edhe një shtyllë e tensionit të lartë, dhe ekipet e OSHEE-së po punojnë në terren.

Njoftimi i policisë 

Në vijim të informacionit paraprak të dhënë pak më parë, ju bëjmë me dije se:

Si pasojë e aksidentit kanë ndërruar jetë 4 personat që udhëtonin me mjetin “Toyota”, shtetasit E. G., 44 vjeç, S. G., 33 vjeçe, A. G., 14 vjeçe dhe E. G., 9 vjeçe.

Ndërkohë, në spitalin e Vlorës po marrin mjekim 3 shtetasit që udhëtonin me mjetin “Audi”, I. M., F. L dhe G. S., të cilët ndodhen jashtë rrezikut për jetën.

Vijojnë veprimet nga grupi hetimor, për sqarimin e rrethanave të aksidentit.