Aksident tragjik/ Shkup-Tetovë, përmbyset autobusi – 13 të vdekur

13 persona kanë humbur jetën dhe mbi 20 të tjerë janë plagosur në autostradën Shkup-Tetovë, ku u përmbys një autobusi me pasagjerë.

Të dhënat u bënë me dije nga Ministri i Shëndetësisë Venko Filipçe në konferencën e parë për media pas aksidentit.

Shtatë prej viktimave kanë ndërruar jetë në vendin e ngjarjes, ndërsa të tjerët në spital. Pothuajse të gjithë të aksidentuarit janë të moshës madhore, ndërsa jo zyrtarisht raportohet se në mesin e të lënduarve nuk ka asnjë fëmijë. Ndërkohë në spitalin “8 shtatori: janë pranuar gjithsej 33 persona.

Më herët, Drejtori i Spitalit të Qytetit “8-shtatori”, Hristian Kostov, njoftoi se në këtë spital, nga pacientët e sjellë, katër persona janë të vdekur, ndërsa një tjetër është në gjendje kritike për jetën.

Nga ana tjetër, 5 persona janë shtruar në qendrën e Urgjencës në Shkup, ku njëri prej tyre është në gjendje më kritike. Bëhet fjalë për një grua e cila është edhe shtatzënë.

“Për momentin gjendja është nën kontroll kemi numër të madh të personelit të mobilizuar, kemi 5 pacientë, një i gjinisë femërore dhe është shtatzënë. Nga dy femrat njëra është në gjendje kritike. Lëndime shumë serioze, tani do ta fillojmë operacionin,” tha Drejtori i Qendrës së Urgjencës, Ilir Hasani.

Dëshmitarët thanë se dyshohet se shkak i rrëzimit të autobusit u bë çarja e gomës.

Pak orë pas ngjarjes, autoritetet bënë të mundur nxjerrjen e të gjithë pasagjerëve nga autobusi.

Ndërkohë, autostrada Shkup-Tetovë u bllokua nga autoritetet, teksa hetuesit po kryenin veprimet hetimore në vendin e ngjarjes.

Autobusi me pasagjerë u nis nga Shkupi në orën 16:00 dhe mësohet se aksidenti ka ndodhur rreth orës 16:30.