Aksidentet, ndryshimet në Kodin Rrugor, Lleshaj: Të bëhet dhe testi “idiotit”!
Duke bërë bilancin e aksidenteve në tryezën për sigurinë rrugore, Ministria e Brendshme propozon ndryshime në Kodin Rrugor si dhe masa të tjera drastike për të parandaluar aksidentet në rrugë ndërsa ministri i Brendshëm, Sandër Lleshaj, duke konstatuar se ka shumë të vrarë në rrugë tha se ka ardhur koha që drejtuesve të mjetit tu bëhet testi “idiotit”.
“Kemi shumë të vrarë në rrugët e vendit dhe ky numër duhet të ulet. Duhet të ulet dhe numri i aksidenteve dhe të plagosurit dhe dëmet material,” tha ministri Lleshaj ndërsa propozon dhe një përvojë gjermane:
“Vetëm për një javë janë hequr 371 leje drejtimi dhe ende persiston një lloj sjelljeje në rrugë e papranueshme. Bie në sy një sjellje agresive në rrugë. Kemi ende përdorues rruge që nuk e meritojnë lejen e drejtimit që kanë. Ka ardhur koha të mendojmë për teste psikologjike për drejtuesit e mjetit që verifikojnë stabilitetin psikologjik të tyre. Në Gjermani quhet testi i “idiotit”.
Përveç kartelës biografike të drejtuesit dhe rishikimit të kohës së vlefshmërisë së patentës, u kërkua edhe rritja e përgjegjësisë së autoshkollave deri në heqjen e licencës për ata që kanë bërë shkelje.
“Në shumë raste autoshkollat nuk plotësojnë detyrimet ligjore për të përgatitur drejtues të aftë dhe përgjegjës për të drejtuar makinat. Mendojmë akredimit për autoshkollat duhet të jenë të akrediutara dhe të licencuara. Nëse nxënësit e saj dëshmojnë paaftësi në drejtimi e mjetit atëherë shkollat përkatëse duhet të mbajnë përgjegjësi deri në momentin që tu hiqet licenca.”
Ministria e Brendshme dhe Policia e Shtetit bënë të ditur se sot deri në fund të muajit shkurt do të organizohen tryeza me të gjitha palët e interesuar deri në, siç u tha, ndryshimet e domosdoshme në Kodin Rrugor me qëllim të rritjes së sigurisë rrugore.
