Aksidenti ajror në Washington, nuk ka të mbijetuar!
Operacioni shumë kompleks i kërkim-shpëtimit vazhdon pasi një avion pasagjerësh u përplas me një helikopter ushtarak mbi Washington, ku nga gjithsej 67 viktima deri më tani janë gjetur 28 prej tyre.
Shefi i Shërbimeve Mjekësore të Emergjencave dhe Zjarrfikësve të Washington DC, John Donnelly, konfirmoi se shërbimet e urgjencës po kalojnë nga një operacion shpëtimi në një operacion kërkimi.
“Nuk besojmë se dikush i mbijetoi këtij aksidenti. Kemi nxjerrë 27 trupa nga avioni dhe një nga helikopteri,” tha Donnelly i cili së bashku me zyrtarët e tjerë në Washington iu drejtua publikut.
Menjëherë pas zyrtarëve në Washington, publikut iu drejtua kryebashkiakja e Wichitas, Lily Wu, qyteti nga i cili u ngrit avioni i American Airlines dhe u përplas me një helikopter ushtarak Black Hawk mbi Washington.
Me lot në sy ajo konfirmoi se i kishin thënë se nuk kishte të mbijetuar. Në qytet ka një trishtim të madh, tha ajo, detajet për tragjedinë ende po vijnë ndërsa falënderoi shërbimet e urgjencës që punuan gjatë gjithë natës.
“Kjo është një tragjedi e tmerrshme që do të bashkojë qytetin,” tha Wu, duke shtuar:
“Familjet e viktimave do të njoftohen përpara se të zbulohen identitetet e tyre”.
Një aeroplan i American Airlines, me 60 pasagjerë dhe katër anëtarë të ekuipazhit, po ulej në Aeroportin Kombëtar Ronald Reagan kur u përplas në ajër me një helikopter ushtarak Black Hawk që transportonte tre ushtarë. Të dy avionët ranë në lumin Potomac dhe avioni u nda në dy pjesë pas përplasjes.
Komunikimi në radio midis kullës së kontrollit të trafikut ajror dhe Black Hawk tregon se ekuipazhi i helikopterit ishte në dijeni se avioni ishte afër.
Sekretari amerikan i Transportit, Sean Duffy, tha se helikopteri dhe avioni po fluturonin në rrugët e tyre normale.
“Nuk kishte asgjë të pazakontë,” tha Sekretari amerikan i Transportit i bindur se aksidenti mund të parandalohej.
Më shumë se 300 persona po marrin pjesë në operacionin e kërkim-shpëtimit që deri më tani kanë gjetur trupat e 27 personave nga avioni dhe një personi nga helikopteri.
