Aksidentoi 63-vjeçaren dhe u largua/ Ilda Bejleri shoqërohet në polici, i sekuestrohet makina

Moderatorja Ilda Bejleri aksidentoi një 63-vjeçare dhe u largua nga vendi i ngjarjes. Tashmë akuzën nuk e bënë mediat të cilat ajo i akuzoi dhe mohoi aksidentin, por policia e cila në informacionin përfundimtar në lidhje me aksidentin e ndodhur mesditën e djeshme në Bulevardin “Gjergj Fishta” në Tiranë, pasi kishte shoqëruar në polici Bejlerin thotë se për të zbardhur aksidentin dhe rrethanat ka sekuestruar ne cilësinë e provës materiale automjetin në pronësi të 33-vjeçares.

Ndërkaq, BW raporton akuzat zyrtare ndaj Ilda Bejlerit, si e dyshuar për ‘Shkeljt të rregullave të qarkullimit rrugor’ dhe ‘Largim nga vendi i aksidentit’.

“Në vijim të informacionit të dhënë në lidhje me aksidentin e ndodhur në Bulevardin ‘Gjergj Fishta’, më datë 12.02.2020, ku ka mbetur e dëmtuar shtetasja me iniciale E. Gj, 63 vjeçe, ju informojmë se: Në vijim të veprimeve hetimore, në orët e mbrëmjes grupi hetimor ka shoqëruar dhe intervistuar në cilësinë e personit ndaj të cilit zhvillohen hetime, shtetasen me iniciale I. B., 33 vjeçe. Policia Rrugore e Tiranës, krahas veprimeve të tjera hetimore, me qëllim sqarimin e rrethanave, në funksion të dokumentimit të plotë të aksidentit rrugor, si pasojë e të cilit ka mbetur e dëmtuar këmbësorja E. GJ., ka sekuestruar ne cilësinë e provës materiale automjetin në pronësi të shtetases I. B., me qëllim këqyrjen dhe kryerjen e ekspertimeve të nevojshme autoteknike.

Në përfundim të veprimeve të para hetimore, materialet procedurale i janë përcjellë Prokurorisë së Rrethit Gjyqësor Tiranë, për hetime të mëtejshme në ngarkim të shtetases I. B, si e dyshuar për veprat penale ‘Shkelja e rregullave të qarkullimit rrugor’ dhe ‘Largimi nga vendi i aksidentit,’” deklaron Policia.

Gruaja e aksidentuar: Do e kisha falur, më preku sjellja e saj!

63-vjeçarja Enriketa Gjuzi, e aksidentuar një ditë më parë nga moderja e njohur sportive Ilda Bejleri, ndodhet aktualisht në spitalin e Traumës, nën kujdesin e mjekëve, në pritjë për t’iu nënshtruar një ndërhyrjeje kirurgjikale në këmbë.  

Nga shtrati i spitalit, Gjuzi për BW rrëfeu gjithë sa mban mend nga aksidenti i një dite më parë. 63-vjeçarja tha se ishte duke kaluar rrugën në momentin që është aksidentuar nga moderatorja Bejleri. Ndonëse e pranon se nuk ndodhej te vizat e bardha, Gjuzi thotë se ka qenë duke kaluar nga njëra anë e rrugës në tjetrën me një grup njerëzish, kalimtarë të rastit.

“Makinat ishin në tre korsi, ndaluan shpejtësinë, ndërsa mjetit që më goditi ia bëra me dorë të ndalojë, por ajo vijoi. Nga xhami nuk e pash kush më goditi. Kalimtarët që më ndihmuan më thanë se ishte Ilda Bejljeri, madje i kërkuan të ndalojë, por ajo u largua. Ndërsa uli xhamin, pa zbritur fare më tha: “pse do të shikoja nga cepi i pasqyrës..”, dhe iku duke i dhënë gaz makinës” – tregon 63-vjecarja.

Gjuzi kujton se ishte ndihmuar nga një drejtues tjetër automjeti, i cili ndodhej në makinë bashkë me gruan e tij shtatzënë.

“Do e kisha falur, vetëm të ndalonte, më preku sjellja e saj,” tha nga spitali 63-vjeçarja.