Video. Aksioni në Veri/ Shkëmbim zjarri, policia thyen barrikadën dhe vazhdon rrugën drejtë Mitrovicës

Pas arrestimeve në Zubin Potok, të shtëna të vazhdueshme me armë zjarri po dëgjohen në Zubin Potok dhe rrethinë ndërsa vazhdon aksioni i Policisë së Kosovës në Veri.

Të shtëna janë dëgjuar edhe në fshatrat Varage dhe Zupç ku janë tubuar qytetarët.

Mësohet se policia ka arritur të thyej barrikadën dhe të vazhdojë rrugën në drejtim të Mitrovicës së bashku me të arrestuarit.

Ndërkohë Policia e Kosovës ka reaguar përmes një shkrese zyrtare duke njoftuar opinionin se operacioni policor i cili po realizohet sot në rajonin e Mitrovicës Veri dhe Mitrovicës Jug, nuk ka të bëjë me rastin e vrasjes së Heroit Enver Zymeri dhe ish politikanit Oliver Ivanoviç.

“Ashtu siç e kemi potencuar edhe në komunikatën e poshtëshënuar, këtij operacioni policor i ka paraprirë një hetim disamujor i IPK-së dhe PK-së i udhëhequr nga Prokuroria Speciale e Kosovës, i cili ka rezultuar me dyshimin e bazuar të përfshirjes së disa zyrtarëve policorë dhe të disa qytetarëve në veprimtari kriminale ‘pjesëmarrje ose organizim i grupit kriminal’ dhe vepra tjera të specifikuara”.

“Ky operacion policor është ende në vazhdim e sipër, si pasojë e rezistencës në Veri të Mitrovicës një zyrtar policor është plagosur por është jashtë rrezikut për jetë, përderisa deri më tani janë arrestuar disa zyrtarë policorë, disa qytetarë si dhe janë konfiskuar gjësende të ndryshme përfshirë edhe disa armë”.