Akt i lartë tradhtie, Berisha: Edi Rama dorëzoi kompjuterët e muxhahedinëve në Iran!

Akti më i lartë i tradhtisë që mund t’i bëhet lirisë dhe të drejtave njerëzore! Kështu e cilësoi Kryetari i Partisë Demokratike, Sali Berisha, dorëzimin nga Edi Rama të 232 kompjuterave të muxhahedinëve në Iran.

“Dorëzimi i këtyre kompjuterëve në Iran, do të thotë dorëzimi i mijëra rezistentëve iranianëve që figurojnë në listat e rezistencës, sepse rezistenca iraniane e muxhahedinëve është një rezistencë e strukturuar në Iran dhe në mbarë botën,” tha sot Sali Berisha duke dënuar me ashpërsi këtë akt ndërsa i bëri thirrje OKB që të ndërmarrë një hetim të menjëhershëm mbi këto akte.

Fjala e plotë:

Një komunikatë e Frontit të Rezistencës së Muxhahedinëve, informon se 232 kompjutera të qendrës së Manzës, kanë përfunduar në Teheran.

Kjo komunikatë nuk është e muxhahedinëve, por është e zëdhënësit të qeverisë, apo të Këshillit Informativ të Iranit.

Në rast se kjo është e vërtetë, ky përbën një akt të tradhtisë më të lartë që mund t’i bëhet lirisë, që mund të jetë bërë ndonjëherë në Shqipëri, kur një grup njerëzish, rezistentë ndaj njërit prej regjimeve më gjakësore, ju ri kujtoj këtu, si sot gjatë vitit që shkoi janë ekzekutuar nga ajatollahët 300 të rinj dhe të reja iraniane, të cilët kanë protestuar dhe protestojnë për liritë dhe të drejtat njerëzore.

Rikujtoj këtu, se regjimi i ajatollahëve është regjimi më i implikuar në tragjedinë, në agresionin rus në Ukrainë, pasi dronët kamikazë të prodhuar në Iran, po vrasin dhe kanë vrarë qindra e mijëra civilë, njerëz të lirë, të pafajshëm në një vend të lirë të agresuar nga Rusia.

Edi Rama në këtë mënyrë është bërë një shtojcë e ajatollahëve dhe ky përbën një akt që tejkalon çdolloj etike dhe morali. Dënoj me ashpërsi më të madhe këtë akt dhe kërkoj me urgjencë që OKB të ndërmarrë një hetim të shpejtë.

Mos harroni se, dorëzimi i këtyre kompjuterëve në Iran, do të thotë dorëzimi i mijëra rezistentëve iranianëve që figurojnë në listat e rezistencës, sepse rezistenca iraniane e muxhahedinëve është një rezistencë e strukturuar në Iran dhe në mbarë botën. Në këtë kontekst kjo është një tradhëti e rëndë që iu është bërë.

Së dyti, i bëj thirrje OKB-së që të marrë tërësisht në mbikëqyrje kampin e muxhahedinëve. Të konsiderosh shpallje lufte cyber-ataket, do të thotë të rreshtohesh me ajatollahët, të cilët vet organizojnë cyber-sulme në dhjetëra e dhjetëra vende dhe institucione të lira në botë Edi Rama pra, është bërë krah i tyre. I ka krijuar vendit një njollë që nuk ka ekzistuar kurrë më parë.

Pyetje: Kreu i Këshillit të Informacionit të qeverisë së Iranit, deklaratën që ju cituat për rrjedhjen e informacioneve e ka dhënë ditën e hënë. Ju jeni besoj në dijeni të marrëveshjes që ka nënshkruar shteti shqiptar, pasi keni qenë kryeministër që keni pranuar personat e parë muxhahedinë në Tiranë. A mendoni z.Berisha që muxhahedinët kanë shkelur qartazi marrëveshjen me aktivitet politik në Shqipëri, pasi ka prova, foto dhe video të dokumentuara që muxhahedinët në Shqipëri kanë organizuar aktivitete intensive politike.

– A mendoni që politikanët në Shqipëri, përfshirë dhe juve, duhet të jenë më të kujdesshëm kur flasin për këtë çështje, pasi nuk është një çështje që i përket vetëm Shqipërisë, pra ju iu referuat një deklarate të Iranit i cili është një shtet dezinformator, një shtet i cili bën propagandë antiperëndimore, dhe që në një investigim që ka nisur një javë më parë nga gazetarët  shqiptarë dhe të huaj nuk kanë arritur në përfundimn që informacionet kanë rrjedhur në Iran deri në këto momente.

Berisha: Të falënderoj për pyejtjen, dhe po të përgjigjem. Po e filloj pikërisht nga kjo.

E thatë që zëdhënësi i Këshillit të Informacionit të Iranit e ka bërë të hënën këtë deklaratë. Deri më sot unë prita që qeveria shqiptare ta përgënjeshtronte këtë deklaratë, dhe nuk ka asnjë përgënjeshtrim, por një deklaratë konkrete, e cila flet për kompjutera, dhe numra kompjuterash të dorëzuara.

Atëherë, sigurisht që unë qendroj, sepse kjo përbën një tradhëti të lartë, kjo përbën tradhëti me implikacione me qindra dhe mijëra jetë njerëzish. I dorëzove tek ajatollahët me ato kompjutera, ndaj dhe ky është një akt tmerrësisht i rëndë.

Vijmë tek e dyta.

E dyta, ka një aparencë, një dukje dhe ka një të vërtetë, një realitet. Cila është aparenca? Aparenca është se, muxhahedinët kanë ardhur në Shqipëri për qëllime humanitare dhe për të mos u marrë me veprimtari subversive, ky ka qenë termi im. Që muxhahedinët të imagjinohen ndryshe, veçse luftëtarë lirie, rezistentë, kjo është qesharake.

Në atë kampin e tyre aty. Jam unë që vura kusht, që pranoj t’i marr, por duhet të hiqen nga lista. Dhe u hoqën nga lista e terroristëve.

Tani, vijmë përsëri. Mediat shqiptare, dhe të gjithë botës kanë transmetuar samitet e tyre të cilat janë mirëfilltas politike dhe vetëm politike. Në ato samite kanë marrë pjesë me dhjetëra e qindra, kongresmenë, parlamentarë, ministra, ish-kryeministra, ministra të jashtëm të vendeve të tjera të cilët nuk kanë arhdur për qëllime humanitare aty, kanë ardhur për mbështetje politike tek ata. Veprimtaria e tyre politike është e ligjshme, po luftojnë një diktaturë dhe asnjë vend i lirë nuk i kufizon ata në luftën kundër një diktature.

Vijmë te veprimi subversiv. Nuk jam dakord, dhe e kam thënë që atëherë që ata të mund të marrin veprime, akte fizike, sulme në territorin e Iranit, ose në asnjë territor tjetër nga Shqipëria. Kjo është e prerë.

Po politikë nga mëngjesi deri në darkë, cyber-sulme sa të kenë fuqi. Çdo propagandë ndaj ajatollahëve është e lejuar dhe e inkurajuar, dhe i garantoj ata se te Sali Berisha kanë një mik të vërtetë dhe PD, e cila do të mbështesë kauzën e tyre dhe ka simpatinë më të madhe për qëndresën që ata bëjnë ndaj regjimit të ajatollahëve.

Faleminderit shumë!