Aktakuza për sulmin terrorist në Banjskë, DASH: Të respektohet procesi gjyqësor!
Shtetet e Bashkuara thanë se inkurajojnë respektimin e procesit gjyqësor dhe sundimin e ligjit, pasi Kosova ngriti aktakuzë lidhur me sulmin terrorist të 24 shtatorit në Banjskë të Zveçanit.
“Sa i përket aktakuzës së Kosovës, ne inkurajojmë për respektimin e procesit gjyqësor dhe të sundimit të ligjit dhe për durim, teksa ky rast i ndërlikuar procedohet në gjykata. SHBA-ja vazhdon të mbështesë fuqishëm sundimin e ligjit, drejtësinë e barabartë dhe qeverisjen e mirë në Kosovë,” tha një zëdhënësi i Departamentit amerikan të Shtetit për RFE.
Nga DASH thanë se presin që Serbia të kërkojë përgjegjësi të plotë për personat e përfshirë në sulmin e shtatorit të vitit të kaluar.
Më 24 shtator të vitit të kaluar, një grup i serbëve të armatosur sulmuan Policinë e Kosovës në veri të Kosovës, duke vrarë rreshterin Afrim Bunjaku. Gjatë përleshjeve që pasuan u vranë edhe tre sulmues serbë.
Gjatë kësaj jave, Prokuroria Speciale e Kosovës ngriti aktakuzë ndaj 45 personave për këtë sulm.
Kosova e konsideron këtë sulm si terrorist, ndërsa liderët shtetërorë akuzojnë shtetin e Serbisë për organizim të sulmit.
Përgjegjësinë për sulmin e ka marrë Milan Radoiçiç, ish-nënkryetar i Listës Srpska. Ai, në aktakuzë, cilësohet si kreu i grupit terrorist.
Ngritja e aktakuzës për sulmin e armatosur në Banjskë është mirëpritur edhe nga Bashkimi Evropian, i cili ndërmjetëson dialogun për normalizimin e raporteve mes Kosovës dhe Serbisë.
Nga Bashkimi Evropian u tha se përgjegjësit duhet të përballen me pasoja, pasi gjyqësori i Kosovës të shpallë aktvendimin ndaj tyre, teksa zëdhënësi i BE, Peter Stano, tha se Brukseli vazhdimisht i ka kërkuar Serbisë që të përfshirët në këtë sulm të dalin para drejtësisë.
Presidenti i Serbisë, Aleksandar Vuçiç, deklaroi dje se autoritetet serbe po e hetojnë sulmin në Banjskë.
Ai tha se ky sulm, për Serbinë, nuk është “terrorist”.
“Por, nuk dua të zgjerohem më tej dhe të shpjegoj përsëri se kush është fajtor për këtë dhe kush e solli këtë gjendje,” tha Vuçiç duke ju drejtuar kombit.
Milan Radoiçiç besohet se gjendet në Serbi. Ndërkaq, të pandehurit e tjerë, sipas aktakuzës, të gjithë janë në arrati përveç tre personave që gjenden në paraburgim në Kosovë: Vladimir Toliç, Blagoje Spasojeviç dhe Dushan Maksimoviç./RFE/
