Aktakuzë ndaj 12 personave për veteranët mashtrues

Prokuroria Speciale e Kosovës ka ngritur aktakuzë pranë Gjykatës Themelore në Prishtinë, kundër 12 të pandehurve, për lëndën e njohur në opinion si ‘Veteranët’, për veprën penale “keqpërdorim i pozitës apo autoritetit zyrtar”.

Prokuroria Speciale e Kosovës thekson se në aktakuzë është propozuar që “gjykata të lëshojë masën për ndalimin e pagesës së pensioneve të fituara në mënyrë të kundërligjshme si veteranë luftëtarë të Ushtrisë Çlirimtare të Kosovës, deri në përfundimin e procedurës penale.

“Nga provat e siguruara deri më tani është vërtetuar se nga pagesat e kundërligjshme për veteranët luftëtarë të UÇK-së, buxheti i Republikës së Kosovës është dëmtuar në shumën prej 68.153.533.14 euro”, bënë të ditur Prokuroria Speciale.

Kryeprokurori i Kosovës, Aleksander Lumezi, tha për Agjencinë e lajmeve Reuters se Agim Çeku, zëvendësministër i Forcës së Sigurisë së Kosovës, dhe shefi i tij, ministri Rrustem Berisha, janë dy nga të akuzuarit.

Çeku ka qenë kryeministër i Kosovës nga viti 2006 deri në vitin 2008, si dhe kryesues i Komisionit për verifikim të veteranëve.