Akuza “falsifikim”, Basha: Prokuroria u përdor nga Edi Rama. Do ta çmontojmë…

Pasi Prokuroria e Tiranës ka mbyllur hetimet duke pushuar akuzën e lobimit rus e pastrimit të parave për Kryetarin e Partisë Demokratike dhe duke e dërguar çështjen në gjykatë me liderin e opozitës si të pandehur për “falsifikim të vulave, stampave ose formularëve”, reagon Lulzim Basha duke theksuar se sot dolën provat që prokuroria ishte përdorur nga Edi Rama për të fabrikuar gënjeshtra që as vetë nuk i beson dhe u detyrua të tërhiqej nga gënjeshtrat, me të cilat operoi për dy vite me radhë.

“1.Tha që kishte prova për pastrim parash vetëm për të hequr vëmendjen nga skandalet e dosjes “339”, që publikoi gazeta “Bild”. Vetëm për këtë arsye fabrikoi këtë akuzë.

2.Tha që kishte dokumente për para ruse dhe e vetmja gjë që prodhoi ishte tërheqja me turp nga këto akuza. Nuk prodhoi asnjë dokument për këtë akuzë qesharake dhe të turpshme, me të cilën u detyrua të gënjente opinionin publik për dy vite me radhë.

3.Tha që kishte dokumente hetimi kundër PD dhe i vetmi dokument hetimi është dokumenti i Bilalit. Prandaj, e vetmja gjë që mund të them sot është se 90% e gënjeshtrës sot është çmontuar para gjithë shqiptarëve. Prokuroria është detyruar të pranojë gënjeshtrat, të cilat i fabrikoi për shkak të presionit politik të Edi Ramës dhe atë 10%, me të cilën ka çuar dosjen në Gjykatë, do të çmontojmë në gjykatë.”

Lidhur me akuzën për “falsifikim të vulave, stampave ose formularëve” me të Prokuroria e konsideron të pandehur, Lulzim Basha shprehet:

“Ky është minimumi, na akuzuan për agjentë rusë, na akuzuan për pastrim parash, na akuzuan për gjithçka që u duhej. Për çdo skandal që u plaste nxirrnin nga një akuzë. Pra, e vetmja gjë që na solli deri këtu është qëndresa për të vërtetën dhe e vërteta do të çmontojë plotësisht edhe këtë 10% që ka mbetur. 90% ka rënë edhe 10% do ta çmontojmë në gjykatë,” tha Kryetari i Partisë Demokratike, Lulzim Basha ndërsa sqaroi edhe akuzën për lobim rus të cilën vazhdojnë ta përsërisin Edi Rama dhe Taulant Balla ndonëse Prokuroria mbylli hetimet:

“Lidhjet me rusët i ka vëllai i Presidentit më të dashur të Putinit në Ballkan. Këtë gjeagjëzë zbërthejeni vetë se besoj i keni informacionet se kush është.”

Ndryshe, sot Prokuroria e Tiranës ka mbyllur hetimet për çështjen e financimeve në SHBA për zgjedhjet parlamentare të vitit 2017 duke pushuar akuzën e lobimit rus e pastrimit të parave për Kryetarin e Partisë Demokratike dhe duke e dërguar çështjen nr.645 në gjykatë me Lulzim Bashën si të pandehur për “falsifikim të vulave, stampave ose formularëve”të parashikuar nga Neni 190/3 të Kodit Penal.