Akuza, Thaçi: Albin Kurti ka uzurpuar zyrën e Kryeministrit!

U paralajmërua si vizitë përkujtimore në 21 vjetorin e Masakrës së Dubravës, por Presidenti i Kosovës, Hashim Thaçi, e përdori si tribunë për të akuzuar Kryeministrin në detyrë, Albin Kurti. Që krimi të jetë edhe më i rëndë, njeriu më antikushtetues në Kosovë, Hashim Thaçi e akuzoi Albin Kurtin se ka uzurpuar zyrën e Kryeministrit edhe pas dy shkeljeve të rënda kushtetuese dhe po sillet si njeri i paligjshëm në skenën politike kosovare.

“Ne të gjithë duhet të fokusohemi në respektimin e plotë të kushtetutshmërisë dhe ligjshmërisë, për fat të keq kemi një njeri që ka uzurpuar zyrën e kryeministrit edhe pas dy shkeljeve të rënda kushtetuese dhe po sillet si njeri i paligjshëm në skenën politike kosovare, si do që të jetë ne duhet të kemi durim, duhet që qartësisht të punojmë por edhe të respektojmë vendimin e Gjykatës Kushtetuese që pritet të dalë në ditët në vijim,” tha njeriu që shkatërroi gjykata kosovare duke shtuar se vendimet e gjykatave duhet të respektohen.

“Unë kam respektuar gjithmonë edhe kur më kanë pëlqyer edhe kur nuk më kanë pëlqyer fare, por sido që të jetë askush nuk është mbi Kushtetutën, mbi ligjet. Unë si president i vendit do të vazhdojë të respektojë gjithë mandatin tim që del nga Kushtetuta e Kosovës, në veçanti me garantimin e funksionimit demokratik të institucioneve të vendit, duke përfshi këtu edhe Gjykatën Kushtetuese sepse mandati im nuk buron nga Gjykata Kushtetuese, por nga Kushtetuta. Ftesa ime është për të gjithë respektim i vendimit të Gjykatës Kushtetuese që do të del.”

Ndryshe, 21 vjet më parë në Burgun e Dubravës është kryer njëra nga masakrat më të mëdha në Kosovë nga regjimi i Milosheviçit. Brenda burgut janë vrarë 160 të burgosur shqiptarë dhe janë plagosur më shumë se 300 të tjerë. Për këtë masakër, ende nuk është dënuar askush.