Akuzat Meta-Yuri Kim, Edi Rama i vë kapak: Kastravec, ti thuash Ambasadores…

Pika që derdhi gotën e helmit në mes të Presidentit të Republikës, Ilir Meta, dhe Ambasadores së SHBA, Yuri Kim ishte mesazhi që zbuloi Meta se i kishte dërguar ambasadores, pas ngjarjes në Elbasan duke e ndërlidhur me plagosjen e Sekretarit të PD brenda zyrës elektorale në Kavajë, Bledar Okshtuni. Por, fundi i debatit që u nxeh në mes të Ambasadores Kim dhe Presidentit Kim me protagonist Kryeministrin Rama shpërfaqi pasojat e një shteti të degraduar nga “koalicioni i qelbësirave”.

“Nëse ju, do të reagonit pas ngjarjes së Kavajës, do ishte parandaluar edhe ngjarja e ndodhur në Elbasan,” tha se ishte shprehur Meta i bindur se nëse ndërkombëtarët do të kishin reaguar për ngjarjen e Kavajës, do të ishte parandaluar vrasja e Pjerin Xhuvanit në Elbasan.

Përgjigja e Ambasadores Kim nuk vonoi madje ishte dhe e ashpër:

“Është e papranueshme për këdo që të kërcënojë se qytetarët do të marrin sfurqet në 25 prill ose nëse nuk u pëlqen rezultati i zgjedhjeve. Këto kërcënime meritojnë dënim,” tha Yuri Kim përmes rrjetit social Twitter duke përfunduar:

“Ata që nxisim dhunë do të mbajnë përgjegjësi për rezultatet e fjalëve dhe veprimet e tyre. Ndal!”

Meqë ishte në studio televizive Ilir Meta i ktheu përgjigjen në çast Ambasadores Yuri Kim ndërsa gjuha që zgjodhi një gjë e sqaroi, Presidenti i Republikës është në hall:

”Tani live sapo më shkruajti ambasadorja Yuri Kim për të mos përmendur më sfurqet. I them ambasadores amerikane live që të mos marrë më në mbrojtje Edi Ramën. Meqë më dergoi live ‘sms’ i them ambasadores amerikane mos e mbështet më Edi Ramën.

Meqë jam transparent po ju them edhe një fakt që ambasadorja amerikane më ka kërkuar mua si President, një ditë para mbledhjes së KED-së të pranoj unë Adrian Dvorani. Këtë ajo e kërkoi jo në emër të Amerikës, po në emër të Edi Ramës. E përqafoj ambasadoren amerikane dhe i them boll ndërhyre në punët e brendshme të Shqipërisë në këtë mënyrë të njëanshme,” tha Meta duke thyer shumë kode, si të privatsisë ashtu dhe atë të diplomacisë, që vetëm lufta që ka hapur me Edi Ramën nuk i arsyeton.

Gjithsesi, reagimin, Ilir Meta e përfundon:

”Deklarata e Yuri Kim është një turp dhe e ftoj ambasadoren të vijë tani live në studio bashkë me Edi Ramën të ballafaqohemi para shqiptarëve!”

Dhe, kur deti i trazuar u qetësua, u shfaq “mesia shqiptare”, duke mbrojtur Ambasadoren amerikane nga Presidenti që kishte zgjedhur vetë, dhe i cili e kishte bërë Kryeministër, dhe jo votat që i dhanë socialistët.

“Unë komentin që bëj e bëj duke iu drejtuar të gjithë atyre që na dëgjojnë. Më 25 prill përveç të tjerëve duhet votuar për dinjitetin e Shqipërisë që është bërë zhele nga një presidentin zhele. Është e pakonceptueshme për një vend si Shqipëria, anëtar i NATO-së pret stërvitjen më të madhe të organizuar nga NATO në këtë pjesë të botës. Është vend për BE dhe ka marr dritën jeshile për çeljen e negociatave. Të dëgjosh një të dehur totalisht që fatkeqësisht është presidenti i Shqipërisë, problemi është çfarë Shqipërie duan shqiptarët të nesërmen, një Shqipëri që të kthehet në duart e Metës dhe Berishës dhe të futet në një kurs përplasjesh me botën, apo një Shqipëri që të çlirohet nga Meta dhe Berisha dhe ti japi opozitës një arsye të reflektojë rreth vetvetes dhe për tu zgjuar pas kaq vitesh. Kjo është zgjedhja. Të komentosh një njeri që është komplet jashtë binarëve dhe është fatkeqësi për gjithë ne, sepse Shqipëria është pa president sot, është hedhur nga dritarja dhe ndodhet mes nesh si një agjitator i dhunë dhe ekstremeve që janë të paimagjinueshme dhe të arrihet të flitet si një kalama, si një kastravec ti thuash ambasadores boll mbrojtje Edi Ramën është një muhabet zhelesh. Është 25 prilli dhe shqiptarët vendosin se me çfarë fytyre duan të përfaqësohen në botë, me çfarë karakteresh duan të përfaqësohen dhe si do jetë ky vend për shumë vite që vjen. Goditja e merituar ndaj Ilir Metës dhe Berishës që janë nën kontroll të gjithçka bën Basha dhe Monika,” u shpreh Kryeministri Rama duke paralajmëruar dy skenarë pas zgjedhjeve, dorëheqjen e Ilir Metës ose nisjen e procedurës për shkarkimin e Ilir Metës me Parlamentin e ri për shkak të degjenerimit të institucionit të Presidentit.

Në fund, ndonëse ky debat ishte i panevojshëm në prag të zgjedhjeve parlamentare ai konfirmoi se koalicioni që Ilir Meta dhe Edi Rama krijuan më 2013 ishte me bazë kërcënimin dhe jo qeverisjen. Ndërkohë flluskat që ngritën mediat në shërbim të Edi Ramës se konfliti Meta-Yuri Kim mund të ndikojë në gjykimin e votuesit më 25 Prill nuk qëndron pasi Partia Demokratike dhe lideri i saj Lulzim Basha ishin të vetmit që zhvilluan një fushatë model, pa fyerje dhe kërcënim si ndaj rivalëve politik ashtu dhe ndërkombëtarëve që në mënyra të ndryshme krijuan dhe idenë se ishin të anshëm.