Akuzat për pengimin e drejtësisë, Hashim Thaçi deklarohet i pafajshëm
Ish-Presidenti i Kosovës, Hashim Thaçi, është deklaruar i pafajshëm lidhur me akuzat kundër administrimit të drejtësisë.
“Pas ftesës së gjykatëses së procedurës paraprake në konferencën për ecurinë e çështjes më 17 dhjetor, Hashim Thaçi u deklarua lidhur me fajësinë në formë të shkruar më 6 janar 2025. Ai u vetëdeklarua i pafajshëm për të gjitha pikat e aktakuzës,” bënë të ditur Dhomat e Specializuara të Kosovës përmes një njoftimi .
Hashim Thaçi po akuzohet për herë të dytë nga Prokuroria e Specializuar në Hagë. ZPS-ja e ngarkon atë me vepra që lidhen me ndikimin në dëshmitarë, derisa ai ndodhet në një proces gjyqësor për krime të pretenduara të luftës.
Më 6 dhjetor 2024, Gjykata Speciale konfirmoi aktakuzë të re kundër Ish-Presidentit, Hashim Thaçi, Ish-Ministrit të Drejtësisë, Hajredin Kuçi, Ish-Shefit të Agjencisë së Kosovës për Inteligjencë, Bashkim Smakaj, Ish-Kryetarit të Malishevës, Isni Kilaj, dhe ish-pjesëtarit të UÇK-së Fadil Fazliut.
Veprat penale për cilat akuzohen Thaçi, Kuçi, Smakaj, Kilaj dhe Fazliu lidhen me pretendimet për “të ndikuar në dëshmitë e dëshmitarëve” në rastin gjyqësor “Thaçi dhe të tjerët”. Dy javë më parë, derisa ka folur në seancë në Gjykatën e Hagës, Thaçi ka kërkuar respektim të Kushtetutës dhe ligjeve të Kosovës.
