Akuzoi NATO-n, Haradinaj shkarkon Zv/ministren e Drejtësisë

Pas reagimeve të shumta ndaj deklaratës së Zv/ministres së Drejtësisë së Kosovës, Vesna Mikiç se bombardimet e NATO-s ishin gjenocid ndaj shtetit dhe popullit serb, kryeministri Ramush Haradinaj e shkarkoi  nga posti me arsyetimin se individët që denigrojnë vlerat e përbashkëta euro-atlantike nuk kanë vend në Qeverinë e Kosovës:

“Në Qeverinë dhe institucionet e Republikës së Kosovës, nuk kanë vend individët, pavarësisht përkatësisë etnike, që denigrojnë vlerat e përbashkëta euro-atlantike. Aq më tepër kur shteti i Kosovës është krijuar pikërisht në bazë të këtyre vlerave,” tha Ramush Haradinaj duke shtuar:

“Deklarata e zëvendësministres në Ministrinë e Drejtësisë, Vesna Mikiç, se bombardimet e NATO-s ishin gjenocid ndaj shtetit dhe popullit serb, janë të papranueshme dhe përkojnë me gjuhën e urrejtjes, që sanksionohen me Kushtetutë dhe ligj. Prandaj, sot kam liruar nga detyra zëvendësministren Mikiç.”