Akuzon opozitën, Rama: Gati paketa e re, në mbështetje të të sëmurëve me COVID-19

Kryeministri Edi Rama sot bëri një përmbledhje të situatës epidemiologjike në vend dhe masave që do të merren në mbështetje të të infektuarve ndërsa akuzave të opozitës iu përgjigj me fyerje. Opozita e ka akuzuar Kryeministrin se nuk ka marrë masa për përballimin e situatës madje e ka akuzuar edhe për vjedhje në kohë pandemie, por Edi Rama nuk iu përgjigj akuzave konkrete, i cilësoi një çetë karagjozësh, ku njëri thotë ma jepni mua se e ndaloj unë zinxhirin e infeksionit, tjetra thotë shkoni në kisha e xhami, dhe tjetri del e thotë se sa medalje do të shpërndahen sot për të vdekurit.

“Ne po e shohim në dinamikë se sa do të jetë infektueshmëria. Dhe për këtë ne kemi gati dhe një paketë tjetër në mbështetje të të sëmurëve për barnat esenciale dhe për të mbështetur familjet me ndihmë ekonomike, pasi gjërat mund të zhvillohen në drejtime të ndryshme. Nuk kemi marrë masa shtrënguese, si në vendet e tjera, pasi ne nuk duam ta mbyllim ekonominë. Mendojmë se ka mundësi të mbahet një ekuilibër dhe ju bëj thirrje të gjithëve të kryejnë detyrat e tyre. Atyre që janë në ndihmë ekonomike deri në fund të pandemisë, do t’i bëjmë një shtesë të mbështetjes financiare,” tha Edi Rama duke shtuar se qeveria ka një strategji për të përballuar situatën dhe se shteti është angazhuar financiarisht edhe për sigurimin e vaksinës.

“Në buxhetin e ardhshëm 9,4% e buxhetit shkon për shëndetësinë dhe është më i larti në këto 30 vjet. Pjesë e këtij është edhe rritja e pagave 40% për 18 mijë personel mjekësor. Është një paketë e tërë specifike 15 milionë euro e siguruara nga Banka Botërore dhe 1,7 miliardë lekë për barnat dhe oksigjenin, 1 miliard lekë për bonusin e mjekëve, i cili vijon të jepet. Mjekët tanë do të çojnë pagë në shtëpi, më shumë sesa do të punonin në Gjermani. 650 milionë lekë janë për punonjësit jashtë sistemit që do të duhet për mjekët dhe infermierët në rezervë. Ata janë me emër dhe mbiemër të regjistruar në listë. Janë 1,2 miliardë lekë për laboratorët në ISHP dhe 1,4 miliardë lekë për sigurimin e vaksinës nëpërmjet mekanizimit Covax.”

Me këtë rast Rama sqaroi edhe situatën e krijuar në spitalet Covid.

“Autoambulancat nuk janë, si ato të Vasilit dhe të Tritan Kryemadhit, janë të pajisur 100% me aparaturat përkatëse dhe me maska oksigjeni. Ndërkohë që bëhet procedura e shtrimit, pacientët marrin të gjithë shërbimin e nevojshëm në autoambulancë. Vende në spitale ka, edhe mund të mos kishte siç po ndodh në Belgjikë dhe Vjenë. Telefonat në pavijonin Covid-19 nuk lejohen, pasi atje nuk është stadium apo sallë dasmash për video.”

Për akuzat e opozitës mbi menaxhimin e situatës së koronavirusit ai kishte rezervuar fyerje që nuk janë risi vetëm kur dalin nga goja e qenies, Edi Rama.

“Pse del Kancelarja e Gjermanisë dhe thotë ‘me keqardhje, por gjurmimi ka hasur vështirë për shkak të rritjes së infeksionit, dhe nuk e ndjekim dot më’?. Pse Presidenti i Francës thotë se iu ka dalë infeksioni jashtë kontrollit? Po vjedhin ata me PPP të gjithë? Kjo është një tallje poshtëruese për politikën, kjo është një lehaqenie, që kur vjen nga njerëz që janë aty për të dhënë alternativa serioze dhe për të folur me gjuhën e së vërtetës, përbën krim. Është kriminale të nxisësh panik me gënjeshtra, dëshpërim me sajesa e fabrikime.

Janë të humbur, të marrë fund dhe prandaj nuk gjejnë dot rrugë si të dalin nga qorrsokaku, ku kanë futur veten e tyre. Një çetë karagjozësh, ku njëri thotë ma jepni mua se e ndaloj unë zinxhirin e infeksionit, tjetra thotë shkoni në kisha e xhami, dhe tjetri del e thotë se sa medalje do të shpërndahen sot për të vdekurit. Vetëm dje në Itali kanë vdekur aq sa kanë vdekur në Shqipëri nga dita e parë. Po ta marrësh me numër popullsie me Italinë, i bie që ne të kishin 30 të vdekur në ditë. Ç’është kjo gjuhë, kjo flamë, kjo marrëzi? Edhe e gjithë politika e tyre është një PPP, me një “0” të madhe, “R” që vazhdon, një “DH” dhe “Ë” në fund,” tha Rama duke mos i dal e keqja me opozitën, Covidin dhe të gjithë që zënë në gojë emrin e tij dhe menaxhimin e situatës.

“Problemi i informacionit është i madh, që lidhet me marrjen e këshillave të duhura nga njerëzit. Është shumë e rëndësishme që njerëzit t’i referohen fakteve e shifrave zyrtare. Është hata e madhe, sikur Covid ka rënë vetëm në Shqipëri, sikur vetëm këtu vdesin njerëz, apo hidhen nga dritarja. Aq shumë fiksohen në drejtimin e gabuar mendja e disave, sa edhe kur ua tregon spitalin nga brenda, e quajnë film.

Sot që flasim në strukturat Covid kemi 30% të kapaciteteve të lira akoma. Jeni të ftuar që nesër, bashkë me ministren e Shëndetësisë, të shkoni dhe të vizitoni spitalin Covid-4, se aty nuk ka akoma pacientë. Ç’do me thënë kjo ‘spitalet në kolaps’? Larg qoftë mund të jenë nesër, por nuk janë. Shikoni si Holanda nuk ka vend në spital dhe Gjermania i ka hapur kanal jeshil për të çuar pacientët. Ne kemi ende rezerva, se lavdi Zotit numrat në terapi intensive janë pak,” tha Kryeministri Edi Rama duke përfunduar:

“Ç’do me thënë kjo që duhet marrë oksigjen në shtëpi? Si mund të merret oksigjeni pa një mjek, pa një kontroll.”