Alarmi/ Europol: Mafia shqiptare po cenon sigurinë në Evropë

Grupet më të dhunshme të krimit të organizuar përbëjnë kërcënimin më të madh për sigurinë evropiane, duke tejkaluar terrorizmin dhe migrimin, tha sot Europol.

Grupet mafioze italiane, shqiptarët dhe evropianët lindorë dhe bandat motorike “të jashtëligjshme” janë lojtarët më të mëdhenj, thanë zyrtarët në një konferencë drejtuar nga antimafia italiane dhe Europol, shkruan AFP.

Por grupet aziatike, afrikane dhe amerikano-jugore janë gjithashtu duke u futur në biznesin e krimit të organizuar prej 110 miliardë euro në vit, ku shumë njerëz punojnë të lidhur gjithnjë e më shumë me njërit-tjetrin, u tha në Hagë.

“Aktualisht krimi i organizuar përbën rrezikun më të lartë për sigurinë e brendshme të BE”, tha kreu i Qendrës Evropiane të Krimit të Organizuar dhe Krimeve të Rënda pranë Europolit, Jari Liukku.

Zyrtarët theksojnë se krimi i organizuar ishte “në hije” vitet e fundit kur Evropa u përball me një valë sulmesh terroriste dhe një krizë të madhe migracioni, por që tani duhej të trajtohej nga bashkëpunimi ndërkufitar.

“Për të parandaluar krimin e organizuar ne duhet të veprojmë ndërkombëtarisht, sepse grupet e krimit të organizuar tashmë po e bëjnë këtë,” shtoi Liukku.

Giuseppe Governale, kreu i Drejtorisë së Hetimeve të Anti-Mafias së Italisë, tha se “Cosa Nostra” siciliane, “Ndrangheta” e Kalabrisë dhe “Kamorra” napolitane ishin ende më të mëdhenjtë, por shtoi se problemi ishte më i përhapur.

“Ky është një problem evropian,” tha ai duke shtuar se Autoritetet evropiane synojnë të godasin pastrimin e parave në veçanti si një mënyrë për të goditur grupet e krimit të organizuar:

“Pesha e pastrimit të parave ka një ndikim të madh në shoqëri, të gjithë sektorët janë destabilizuar dhe mund të rrezikojnë ekonominë dhe sigurinë kombëtare.”

Një shenjë dalluese e grupeve të reja të krimit të organizuar ishte një nivel në rritje i dhunës, thanë zyrtarët në konferencë.

Suedia në veçanti ka parë një rritje të pashembullt të dhunës, e ngjashme me një “forcë të ulët lufte”, tha zyrtari i lartë i policisë suedeze Jale Poljarevius.

Të shtënat fatale janë rritur nga 15 në vit në 2011 në mbi 40 në vitin 2018, ndërsa në tre muajt e parë të vitit 2019 ka pasur 12 vdekje me armë në 67 shkëmbime me armë zjarri si dhe një të vdekur në 47 shpërthime me granata.

Në dhjetor autoritetet e BE njoftuan arrestimin e rreth 90 të dyshuarve mafiozë të Ndrangheta në gjashtë vende në Evropë dhe në Amerikën e Jugut.