Albin Kurti: Besoj që Arben Vitia do të jetë Kryetar i Komunës Prishtinë!

Kryetari i Lëvizjes Vetëvendosje dhe Kryeministri i Kosovës, Albin Kurti, sot vlerësoi se zgjedhjet lokale të 17 Tetorit ishin të lira, të drejta dhe fer ndërsa u shpreh i kënaqurme arritjet në këto zgjedhje, pasi edhe në nivel vendi, Vetëvendosje, sipas tij, u bë subjekti i parë.

“Dje u mbajtën zgjedhjet lokale në komunat e Kosovës, të cilat ishin të lira demokratike dhe fer. Megjithatë të gjitha ankesat do të trajtohen nga organet përkatëse. Si kryeministër, jam fort krenar që kishim miq evropian që vëzhguan demokracinë tonë, që mund të shërbejë si vend shembull në rajon dhe jo vetëm,” tha Albin Kurti në daljen e tij të parë publike pas zgjedhjeve lokale të 17 Tetorit duke u shprehur i kënaqur që sheh kaq shumë kandidatë të Lëvizjes Vetëvendosje që kanë shkuar në balotazh.

“Kjo është një shans që të vazhdojmë të flasim e të diskutojmë me qytetarët e Kosovës se si t’i mbrojmë e avancojmë të arriturat e këtij gjysmë viti të qeverisjes së mirë dhe se si t’i zgjerojmë mundësitë dhe të shtojmë kujdesin për të gjithë,” tha Kurti duke shtuar se ndryshimi i bërë realitet në rrafshin qytetar, nuk është vetëm plane, por nënkupton plane aktuale, plane që mund të realizohen.

“Jam i etur të bashkëpunoj me secilën komunë që vlera tona të përbashkëta të arrijnë në çdo shtëpi. Do të qëndroj pranë çdo kryetari komune që dëshiron të bëjë reforma. Urime të gjithë kandidatëve. Kjo është një festë e madhe e demokracisë. Kandidatët e Vetëvendosjes do të jenë të angazhuar në të gjithë territorin në ditët në vijim. Qysh sonte do të takohem me kandidatët e Vetëvendosjes që janë në balotazh dhe do të bëjmë planet tona se si të ecim më tej,” tha Kryetari i Lëvizjes Vetëvendosje duke mos e fshehur se në balotazh do të synojnë që të fitojnë të gjitha komunat në garë ndërsa shprehu bindjen se në Prishtinë do të fitojë kandidati i tyre, Arben Vitia.

“Unë shpresoj, por edhe besoj që Arben Vitia do të jetë kryetar i kryeqytetit dhe më 15 nëntor do ta marrë detyrën aty ku duhet dhe ku kanë thënë edhe qytetarët e kryeqytetit.”

Ndryshe, sipas rezultateve paraprake, në raundin e parë Lëvizja Vetëvendosje nuk ka fituar asnjë nga 38 komunat ndërsa në balotazh do të garojnë për Kryetar në 12 komuna. Bbalotazhit pritet të mbahet pas katër javësh.