Albin Kurti: Datën për formimin e qeverisë ma përcakton LDK, jo Presidenti!
Kryetar i Lëvizjes Vetëvendosje dhe kandidati për Kryeministës, Albin Kurti, duke deklaruar se në janar të vitit 2020 do të vazhdojnë përpjekjet për formimin e një koalicioni me Lidhjen Demokratike të Kosovës ai sqaroi se datën për krijimin e qeverisë e përcakton LDK dhe jo Presidenti.
“Presidenti e ka përcaktuar datën e seancës konstituive për 26 dhjetor kur ne ishim aty dhe në kohë rekord e konstituam Kuvendin. Presidenti përcakton datën e konstituimin të kuvendit dhe jo formimit qeverisë, formimin e qeverise e përcakton dikush e jo presidentin. Mua datën ma përcakton LDK, nuk bënë të ketë keqkuptime. Takimet do të ndodhin dhe do të ketë konsultime. Ndërkohë po i intensifikojmë bisedimet,” tha Albin Kurti në fjalën e tij para Këshillit të Përgjithshëm duke sqaruar se Lëvizja Vetëvendosje u tregua shumë gjeneroze duke ia ofruar LDK-së njërin nga postet që qytetarët ua dhanë atyre, por ajo e refuzoi.
“Në janar kemi përpara arritjen e marrëveshjes me LDK-në. 80 ditë nuk mjaftuan për ta arritur marrëveshjen që kërkohej sepse kishte kërkesa përtej mandatit. Ne kemi marrë mesazh të qartë në zgjedhje, që opozita e djeshme të jetë pozita e ardhshme. Ne si lëvizje jemi munduar të reflektojmë në këtë mesazh. Ne kemi ofruar njërin nga dy postet që qytetarët na ofruan neve. E ofruam pozitën e kryeparlamentarit por ajo u refuzua.”
Viti 2019 ishte vit pa ngjarje të rëndësishme e pa suksese, deri në zgjedhjet e 6 tetorit, dhe i vetmi vendim i mirë në vitin që po lëmë pas, tha Albin Kurti, është dorëheqja e Ramush Haradinajt.
