Albin Kurti: Do ta respektoj vendimin e Gjykatës Kushtetuese!

Kryeministri në detyrë, Albin Kurti, u zotua sot se do ta respektoj vendimin e Gjykatës Kushtetuese të Kosovës i cili pritet të merret deri më 8 Gusht, ndërsa për vendimin e Presidentes Vjosa Osmani për tërheqjen e kërkesës së nga Gjykata Kushtetuese tha se ajo nuk ishte në dijeni se gjyqtari Radomir Laban do të jetë kryesuesi i çështjes që do të trajtohet nga Kushtetuesja, për të cilin edhe Kurti mendon se është rrezik për rendin kushtetues të Kosovës.

“Atëherë pati aplikuar për t’u bërë anëtar i Gjykatës Kushtetuese. Deputetja jonë, në emër të Grupit Parlamentar, asokohe ishim në opozitë, Albulena Haxhiu i pati shkruar letër Zyrës së Presidentit, por fatkeqësisht as presidenti i atëhershëm më vitin 2018, as kryetarja e Gjykatës Kushtetuese në vitin 2018, nuk e kanë parë të arsyeshme që ta ndalin një proces të tillë, sepse është absurde që dikush i cili, sipas informacioneve që kemi nga institucionet e sigurisë, është i papërshtatshëm dhe rrezik për rendin tonë kushtetues tash të gjykojë mbi një çështje kushtetuese,” tha Albin Kurti ndërsa u zotua me këtë rast se do ta respektojë vendimin e Gjykatës Kushtetuese.

“Mendoj që duhet të presim edhe fare pak ditë, do të na njoftojnë se çfarë kanë menduar se do të ndodh pas 30 ditëve. S’e di cila do të jetë zgjidhja, por ne kemi thënë se e respektojmë aktgjykimin e Gjykatës Kushtetuese.”

Ndërskohë i pyetur për takimin me të Dërguarin e BE-së për dialogun Kosovë-Serbi, Peter Sorensen, Kryeministri në detyrë tha se ishte një takim i gjatë me ç‘rast diskutuam për gjendjen e komuniteteve në Kosovë, në veçanti për komunitetin serb

“Ishte një takim i gjatë me emisarin Special i BE-së, zoti Sorensen me ç‘rast diskutuam për gjendjen e komuniteteve në Kosovë, në veçanti për komunitetin serb. Unë e njoftova atë për të drejtat e komunitetit serb që i gëzon sipas Kushtetutës së Kosovës dhe, përveç se i kanë ulëset e rezervuara në Kuvendin e Republikës, gjithashtu gjuha zyrtare serbe është jo vetëm në komuna ku ata janë shumicë serbe, por gjithandej në çdo nivel,” tha Kryeministri në detyrë Albin Kurti duke bërë të ditur se rreth 100 serbë të rinj janë punësuar në veri, aty ku aktualisht kryetarët janë shqiptarë ndërsa përfundoi:

“Kërkova që të ketë mirënjohje për shtetin e Kosovës, sepse nuk ka asnjë incident midis punëtorëve serbë dhe shqiptarë në katër komunat veriore”, theksoi Kurti, derisa shtoi se kjo që po bëhet tani “nuk është shkelje e Marrëveshjes së Brukselit apo e Aneksit zbatues të Ohrit, por përkundrazi në përputhje me të.”