Albin Kurti: E kemi obligim ta ruajmë Kullën e Jasharjve
Pas homazheve tek Kompleksi Memorial “Adem Jashari” në Prekaz me rastin e 24-vjetorit të sulmit të dytë nga forcat serbe ndaj familjes Jashari, Kryeministri i Kosovës, Albin Kurti, ndërsa inepsktoi dhe ndërhyrjet emergjente në Kullën e Jasharajve tha se është obligim institucional, shoqëror e kombëtar që Kullat e Jasharajve të mirëmbahen meqë janë margaritar i historisë së lavdishme dhe njëkohësisht të historisë së dhimbshme.
“Sot me rastin e 24 vjetorit të sulmit mbi Jasharajt në 22 janarin e 1998, erdhëm që të bëjmë homazhe tek varret e tyre dhe njëkohësisht më pas të shikojmë se si janë duke u bërë ndërhyrjet emergjente në Kullën e Jasharajve, si janë duke u bërë ato shtrëngimet fillestare në mënyrë që kjo ndërtesë të mos degradohet dhe të mbrohet. Sot janë bërë 24 vjet prej kur forcat e shumta policore e ushtarake të Serbisë ia mësynë gjatë luftës çlirimtare për herë të parë kullës së Jasharajve,” tha Albin Kurti i cili i shoqëruar me ministrin e Kulturës, Rinisë dhe Sportit MKRS, Hajrulla Çeku, dhe ministri i Mbrojtjes Armend Mehaj, shtoi:
“Para se të ndodhte Epopeja e UÇK-së ka pasur sulme mbi këtë kullë, madje sulmi i parë është qysh në vitin 1991 para se më shumë se 30 vjetëve dhe ne e kemi obligim institucional, kombëtar e shoqëror që këtë objekt të historisë së veçantë të Kosovës e kombit shqiptar në përgjithësi ta mirëmbajmë sepse është një margaritar i historisë sonë të lavdishme dhe njëkohësisht edhe të dhimbshme.”
Me këtë rast ministri i Mbrojtjes, Armen Mehaj tha se restaurimi i Kullave të Jasharajve mbetet projekti nacional në top prioritet.
“Sot së bashku me kryeministri Kurti dhe bashkëpunëtorët tjerë ministra e deputetë, bëmë vizitë dhe homazhe para varreve të Jasharajve Legjendar, në Kompleksin Memorial “Adem Jashari” në Prekaz, në përkujtim dhe nderim të 24-vjetorit të rezistencës dhe fitores së Familjes Jashari, ndaj sulmit të dytë të forcave pushtuese kriminale të Serbisë. Atë ditë Komandanti Adem Jashari nuk ishte në shtëpi, e sulmit tinzar në orët e hershme të mëngjesit , i ishin përgjigjur me zjarr Baca Shaban e Hamza bashkë me nipa e mbesa, ku kishin marrë plagë disa anëtarë të familjes Jashari, ndërsa forcat e armikut ishin detyruar të tërhiqen,” tha Mehaj duke shtuar se kjo ngjarje ishte dëshmia më e fuqishme se tani më, me regjimin okupues fashist e kriminal të Serbisë, e vetmja zgjidhje ishte rezistenca e armatosur dhe lufta deri në fund për çlirim definitiv ndërsa përfundoi:
“Restaurimi i Kullave të Jasharajve, që bartin peshën më të madhe të ndërgjegjies sonë kombëtare, do të jetë projekti ynë nacional në top-prioritet , sepse këtë ia kemi borxh, jo Familjes Jashari sepse atë dhanë gjithçka për Lirinë tonë, por ia kemi borxh historisë sonë të lavdishme dhe brezave të ardhshëm të kombit. Të lavdishëm gjithmonë Jasharajt Legjendar.”
