Albin Kurti i kërkon Gjykatës Kushtetuese të respektojë legjislacionin në fuqi

Kryeministri në detyrë i Kosovës, Albin Kurti, i ka dërguar sot Gjykatës Kushtetuese një parashtresë ku thekson shqetësimet e Qeverisë në lidhje me procedurat që po zhvillohen pranë kësaj Gjykate pas kërkesës së dorëzuar nga disa deputetë të Parlamentit të Kosovës.

Albin Kurti i ka kërkuar Gjykatës që të respektojë afatet ligjore të përcaktuara me Ligjin për Gjykatën Kushtetuese i cili i njeh Qeverisë një afat prej 45 ditësh për t’u përgjigjur në kërkesën e dorëzuar, dhe jo një afat 4 ditor të cilën e kërkonte Gjykata në njoftimin e saj.

Kryeministri Kurti sqaroi se shkresa që ka dërguar në Gjykatën Kushtetuese është për deputetët që po synojnë të problematizojnë masat e qeverisë që i ka marrë Ministria e Shëndetësisë.

Në fund, Kryeministri në detyrë Albin Kurti tha se Qeveria me tërë kapacitetin e saj është e përkushtuar në luftën kundër infeksionit COVID-19 dhe pret që Gjykata, ngjashëm sikurse institucionet ekuivalente me të në shtetet perëndimore, të tregojë kujdes të veçantë ndaj jetës dhe shëndetit të qytetarëve.