Albin Kurti: Kosova synon të tërheqë investimet e huaja direkte
Sot në takimin e Këshillit Kombëtar për Ekonomi dhe Investime në Prishtinë, Kryeministri Albin Kurti, foli rreth mundësive të furnizimit të Kosovës me energji të ripërtëritshme, ku tha se kanë qëllime ambicioze rreth peizazhit energjetik, duke vazhduar njëkohësisht ndërtimin mbi pasuritë tona minerale.
“Kosova është duke iu drejtuar energjisë së ripërëritshme, me qëllime ambicioze për të transformuar peizazhin e saj energjetik, përderisa gjithashtu vazhdojmë të ndërtojmë mbi trashëgiminë tone të pasur minerale. Para pak javësh kemi përmbyllur ankandin e parë për 100 megavat në Rahovec, me ç’rast 6 korporata serioze ndodhen në garë për prodhim të energjisë së ripërtëritshme, në këtë rast, diellit,” tha Albin Kurti duke bërë të ditur se investimet e huaja direkte janë dyfishuar.
“Planifikohen të jenë edhe 150 megavat tjerë në llote me nga 75 megavat, për të cilat destinacioni nuk do të jetë i specifikuar, duke marrë parasysh se përcaktimi do të bëhet në koordinim me korporatat fituese,” tha Kryeministri Kurti duke saktësuar se pritet që të finalizohen në korrik të këtij viti.
“Synimi ynë është që me strategjinë 2022-2031, t’i shtojmë 1200 megavat prodhim të energjisë elektrike nëpërmjet burimeve të ripërtëritshme, që është shumë ambicioze, por njëkohësisht e realizueshme.”
Me këtë rast, Kryeministri i Kosovës Albin Kurti, tha se bujqësia është njëri ndër sektorët që ka shënuar eksporte ndërsa bum të zhvillimit ka shënuar edhe sektori IT-së.
