Albin Kurti: Lëvizja Vetëvendosje ka mbështetjen e Internacionales Socialiste

Në ditën e fundit të fushatës zgjedhore, Lëvizja Vetëvendosje dhe lideri i saj Albin Kurti ka pranuar edhe një mbështetje ndërkombëtare.

Lëvizja Vetëvendosje njofton se Sekretari i Përgjithshëm i Internacionales Socialiste, Luis Ayala, organizatë kjo që numëron mbi 100 parti të majta, i ka dërguar letër Lëvizjes Vetëvendosje dhe kandidatit për kryeministër, Albin Kurti.

“Përderisa vendi do të votojë këtë të dielë, më 14 shkurt, jam shumë i lumtur që në emër të Internacionales Socialiste, organizatës botërore të partive social demokrate, të punës dhe demokratike socialiste, t’ua dërgoj urimet më të mira për suksesin tuaj, i bindur që partia juaj dhe personalisht ju do të bëni një kontribut të madh për të ardhmen e Kosovës dhe qytetarëve të saj, në një kohë kur vlerat dhe idealet tona të përbashkëta janë të domosdoshme në këtë kohë të krizës politike, ekonomike dhe shoqërore,” shkruan Ayala duke i uruar sukses përfundon:

“Sukses në këto zgjedhje, të bindur që do të bëni ndryshim brenda dhe jashtë vendit, dhe që pritjet dhe shpresat e popullit të Kosovës do të gjejnë në ju dhe në partinë tuaj një partner të besueshëm në realizimin e prioriteteve dhe qëllimeve të cilat i keni paraqitur përgjatë fushatës”.