Albin Kurti: Ligji e rregullon pagën, kurse përfitimet janë mirënjohje

Kryeministri Albin Kurti tha se Ligji i miratuar së fundmi në Parlamentin e Kosovës e rregullon pagën minimale dhe jo përfitimet e mirënjohjet ndaj veteranëve të Ushtrisë Çlirimtare të Kosovës.

Nga komuna e Lipjanit, Kurti u shpreh edhe për protestën e veteranëve të UÇK-së, e cila është paralajmëruar të mbahet sot.

“Ligji i cili kaloi së fundmi në Kuvendin e Republikës së Kosovës e rregullon pagën minimale. Ne jemi për benifite sa më të larta për veteranët e UÇK-së, mirëpo këto benifite s’janë punë. Paga është për punë, ndërkaq benifitet janë mirënjohje e shoqërisë, e cila u jepet veteranëve të luftës për luftën çlirimtare, fitimtare e cila është në burim të shtetësisë, pavarësisë e lirisë sonë,” tha Kryeministri i Kosovës duke shtuar se si ekzekutiv angazhohen për të pasur një ligj të ri, por për këtë gjë u nevojiten faktet të jenë të sakta.

“Unë besoj se në luftë kanë qenë më shumë se 60 mijë pjesëmarrës, mirëpo ka një lloj trefishimi të numrit të veteranëve, andaj është e domosdoshme që gjërat t’i quajmë me emrat adekuat. Veteranët sipas komandantëve të UÇK-së janë diku 20 mijë, mirëpo nëse i bashkëngjisim edhe pjesëmarrësit atëherë janë më shumë se 60 mijë,” u shpreh Kurti duke sqaruar se ajo që i duhet Qeverisë dhe Parlamentit është dosja në prokurori, si kthim në të vërtetë faktike të numrit të veteranëve.

“Unë do të dëshiroja që kur të merremi me organizatat e dala nga lufta, të krijojmë mundësinë që veteranët edhe të punojnë, sepse një numër i madh i tyre s’janë për pensionim sepse janë të rinj, shumë nga ta si kanë as 50 vjet.”

Kurti: Qeveria nuk provokoi, sulmi i opozitës ishte i përgatitur

Lidhur me përleshjen e fundit në Parlamentin e Kosovës mes mazhorancës dhe opozitës, Kryeministri Albin Kurti tha se ata që duan të sulmojnë, kërkojnë shkaqe.

“Aty nuk bëhej fjalë për provokim apo kundërprovokim, por është sulm i përgatitur meqenëse shpejtësia me të cilën ja mësyn nga ulëset e tyre disa deputetë drejt ulëseve të kolegëve të mi nga Qeveria teksa unë mbaja fjalim tregon qartazi se s’kishte asgjë spontane,” u shpreh Kurti duke kujtuar se atë ditë i është penguar fjala e tij si Kryeministër, pavarësisht që pas pushimit prej dy orëve ai ishte i gatshëm për t’iu përgjigjur tre pyetjeve parlamentare, të cilat ia kishte shtruar opozita.

Në fund, Kryeministri i Kosovës, Albin Kurti, kërkoi nga deputetët që të organizojnë debate parlamentare, në të cilat, siç tha ai, “do t’i shoshisim mendimet tona pa dhunë”.