Albin Kurti: Masat e BE-së ndaj Kosovës duhet të hiqen sa më parë!

Kryeministri Albin Kurti kërkon që masat e vendosura nga Bashkimi Evropian ndaj Kosovës të hiqen sa më shpejt, pasi Qeveria e Kosovës ka qenë e përkushtuar në dialog dhe në depërshkallëzim të situatës në veri. Këto deklarata Kurti i bëri në Maqedoninë e Veriut, pas vizitës që i bëri Shkupit dhe Tetovës.

“Besoj se duhet të hiqen sa më parë sepse Kosova është konstruktive, qeveria e Kosovës ka qenë kreative me ide dhe të përkushtuar në dialog, që ka rezultuar me marrëveshjen bazike. Me 27 shkurt ne në Bruksel e kemi realizuar marrëveshjen bazike, që është njohje reciproke de facto. Në marrëveshjen e Ohrit ia bashkëngjitëm edhe një aneks implementimi me 12 pika, por është Beogradi që e ka shkelur këtë,”Albin Kurti për TV Koha në Tetovë duke stuar se kundërshtimet për marrëveshjet nuk vinë nga Kosova, por nga Serbia.

Ndërkohë Kryeministri i Kosovës ka folur edhe për raportet e tij me Kryeministrin e Shqipërisë, Edi Rama dhe liderin e shqiptarëve në Maqedoni të Veriut, Ali Ahmeti.

“Ne kemi raporte korrekte, kemi raporte të mira, është çështje e përgjegjësive Kjo nuk do të thotë që nuk kritikohemi. Besoj që kritikat janë pjesë e demokracisë dhe ato duhet të jenë konstruktive,” tha Albin Kurti i cili edhe në Tetovë rikujtoi anulimin e mbledhjes së dy qeverive nga Kryeministri Edi Rama, duke e konsideruar si gabim të Tiranës.

“Është për të ardhur keq që më 14 qershor nuk u mbajt mbledhja e dy qeverive, që u përgatit muaj më parë, por anulimin e saj nuk e kemi bërë ne, përkundrazi ne i kemi bërë të gjitha përgatitjet. Është mirë që të mos pritet mbledhja e ardhshme që të nënshkruhen ato marrëveshje, që më në fund u bë nga Tirana zyrtare përveçse nga Prishtina.”

Albin Kurti tha se ka kontakte të mira edhe me krerët e partive të tjera politike shqiptare dhe maqedonase ndërsa sqaroi se vizita e tij në Shkup dhe Tetovë nuk është partiake por kombëtare.

“Edhe me LSDMN-në kemi kontakte në forume të ndryshme ndërkombëtare, por edhe të drejtpërdrejta për shkak se edhe ata janë në mesin e këtyre partive socialdemokrate. Kështu që kjo vizitë nuk është partiake, është kombëtare është për të mirën e të dy shteteve tona, është për të mirën e qytetarëve në të dy anët e kufirit.”