Albin Kurti merr mandatin, Isa Mustafa mbledhë Kryesinë e LDK

Pas mandatimit të Albin Kurtit për Kryeministër të Kosovës nga Presidenti Hashim Thaçi, Isa Mustafa ka vendosur të mbledhë Kryesinë e LDK.

Mësohet se mbledhja e Kryesisë së LDK-së do të mbahet nesër në ora 14:00, në selinë qendrore të degës në Prishtinë.

Ndërkohë Nënkryetarja e LDK-së, Vjosa Osmani, është shprehur se ka vullnet për marrëveshje me Vetëvendosje dhe tani pas nominimit të Albin Kurtit këto dy javë duhet të shfrytëzohen për marrëveshje e jo për t`ia  lënë fajin njëra – tjetrës.

“Qëndrimi i LDK-së është thënë qartë gjatë ditëve që shkuan, është konfirmuar edhe nga ne që jemi pjesë e organeve të LDK-së dhe nga vet kryetari që LDK-ja ka vullnet që të arrihet një marrëveshje me Vetëvendosjen, tanimë që zyrtarisht e kemi mandatimin e kandidatit për kryeministër dhe koha është e përcaktuar me Kushtetutë të vendit.

“Ajo për të cilën bëj thirrje unë, është që dy javët e ardhshme të shfrytëzohen maksimalisht për arritjen e marrëveshjes e jo për fajësime ndaj njëra -tjetrës, besoj e kemi shumë të qartë se cili ka qenë vullneti i qytetarëve i 6 tetorit dhe të gjitha mospajtimet që na kanë ndarë duhet të lihen anash dhe ditët në vijim duhet të shfrytëzohen maksimalisht dhe me respekt të ndërsjellë për të arritur një marrëveshje me të cilën të dyja partitë ndihen se janë të përfaqësuara. Në përputhje me votat e qytetarëve që i kemi marrë më 6 tetor”.

“Marrëveshja mund të arrihet vetëm nëse ka vullnet të qartë nga të dyja palët dhe vetëm nëse ka gatishmëri për të arritur tek një mes në një kompromis të cilin të dyja partitë ndihen që vullnetshëm po hyjnë në koalicion. Duhet të investohet që të rikthehet besimi, të ulemi në tavolinë me respekt të ndërsjellë dhe duke pasur parasysh fuqinë politike që e përfaqëson njëra dhe tjetra, duke pasur parasysh votat që i kemi marrë më 6 tetor,” tha Vjosa Osmani e bindur se ky vullnet ekziston, ata kanë hy për ta çuar PAN-in në opozitë dhe duhet ta lënë në opozitë aty ku është.

Në fund, ajo e thotë qartse nuk është dakord me veprimet e Albin Kurtit duke postuar e video-mesazhe.

“Unë nuk besoj që kjo qasje i ndihmon arritjes së marrëveshjes, palët duhet të ulen me synimin për të gjetur një mes, një kompromis në atë se dy palët e kuptojnë se janë duke ndërtuar të ardhmen e Kosovës” .

Ndryshe, pasi Lëvizja Vetëvendosje në mungesë të një marrëveshje me LDK-në i nisi Presidentit Hashim Thaçi propozimin për Kryeministër, Albin Kurti përmes një video-mesazhi iu drejtua qytetarëve të Kosovës.

Albin Kurti e ka bërë të qartë se nuk e ka pranuar propozimin e fundit të drejtuesve të LDK-së sepse nuk mund të kthehen në të kaluarën, pra posti i kryeparlamentarit nuk mund të bëhet më pjesë e Marrëveshjes.

“Ne nuk e kemi pranuar propozimin e fundit të drejtuesve të LDK-së por jemi treguar shumë të gatshëm për takime të mëtejmë tjera me synim gjetjen e alternativave të tjera që do ishin të pranueshme për të dy palët. E theksoj përsëri: Nuk mund të kthehemi në të kaluarën, nuk mund të kthehemi në vitin 2019. Ata s’e kanë pranuar propozimin tonë të fundit ndonëse ndryshe nga dakordimi nuk e trajtuan fare në Këshillin e tyre të Përgjithshëm,” tha Kurti i bdinur se mund t’i kthehen tryezës së bisedimeve me LDK-në, madje sipas tij, ky është detyrim ndaj qytetarëve.

“Unë besoj se ne mund të kthehemi dhe e kemi detyrim ndaj të gjithë jush që të kthehemi në tavolinën e bisedimeve, për të mos dalë nga ajo deri në gjetjen e një gjuhe të përbashkët dhe arritjen e marrëveshjes sonë. Ne , si Lëvizje Vetëvendosje, kemi marrë mandatin ta bëjmë qeverinë që ju e dëshironi e që vendit i duhet me aq urgjencë. E kemi filluar duke çliruar nga kapja udhëheqjen e Kuvendit, nuk është më aty pronto kryeparlamentari, që shante e kërcënonte nga foltorja, por kryetari i ri Glauk Konjufca . Unë besoj se ne mund të kthehemi e duhet të kthehemi në tavolinën e bisedimeve. Në ditët në vijim do të takoj edhe përfaqësuesit e pakicave!”