Albin Kurti: Ndërhyrja e NATO-s për të ndalur gjenocidin mban vulën e Albright!
Kryeministri i Kosovës, Albin Kurti, bashkë pas homazheve te busti i Ish-Sekretares amerikane të Shtetit, Madeleine Albright, tha se politika, diplomacia dhe historia vështirë se kombinohen në një mënyrë më të përsosur sesa te personaliteti i jashtëzakonshëm i Sekretares Madeleine Albright.
“Dija e saj e thellë, mendja e mprehtë, dashuria e paepur për të drejtat dhe liritë e qytetarit në republikë, orientimi i saj për demokracinë sociale dhe gjithashtu edhe njohuritë e jashtëzakonshme për gjeopolitikën, e bëjnë një personalitet i cili do të kumbojë gjatë jo vetëm në politikën dhe qeverisjen në Shtetet e Bashkuara të Amerikës e te ne në Kosovë po edhe në shumë vende tjera të botës,” tha Kryeministri Kurti duk eshtuar:
“Ndërhyrja e NATO-s për të ndalur gjenocidin në Kosovë me bombardimet kundër Jugosllavisë dhe Serbisë së Millosheviçit, padyshim që mbanë vulën e zonjës Albright dhe për këtë ne do të jemi përjetë falënderues e mirënjohës.”
Ndryshe, sot mbushen 23 vjet nga fillimi i bombardimeve të NATO-s ndaj Ish-Republikës Federale të Jugosllavisë, me njësitë federale që kishte Serbinë dhe Mali i Zi.
Njoftimin për fillimin e fushatës bombarduese e dha Presidenti i Shteteve të Bashkuara, Bill Clinton, si mundësi e vetme, siç tha, për përfundimin e luftimeve në Kosovë.
“Ne dhe Aleanca e NATO-s kemi bërë të gjitha përpjekjet, me qëllim që të arrinim një zgjidhje paqësore të konfliktit në Kosovë. Por presidenti Millosheviç, i cili në të kaluarën e afërt shkaktoi luftëra të tmerrshme në Kroaci e në Bosnjë, ka vendosur në favor të agresionit në vend se të paqes,” tha Presidenti Clinton.
Operacionet e NATO-s përfunduan pas nënshkrimit të marrëveshjes tekniko-ushtarake për tërheqjen e ushtrisë dhe policisë jugosllave nga Kosova.
Në shënimin e 23-vjetorit të ndërhyrjes së NATO-s në Kosovë, Parlamenti i Kosovës sot do të mbajë seancë të veçantë.
Ndërkohë Kryeministri i Kosovës, Albin Kurti, ka bërë homazhe te busti i Ish-Sekretares amerikane të Shtetit, Madeleine Albright, e cila dje ndërroi jetë, bashkë me kryetarin e Parlamentit, Glauk Konjufca.
