Albin Kurti në Londër: Ka shumë xhelozi, inat e cinizëm – zgjedhjet alternativë

Kryeministri në detyrë dhe Kryetari i Lëvizjes Vetëvendosje, Albin Kurti, gjatë një takimi me diasporën në Londër, ku merrë pjesë në Samitin e Procesit të Berlinit, tha se po përpiqen maksimalisht për krijimin e qeverisë së re, por e pranoi se kjo nuk është e lehtë për t`u arritur.

Madje sipas Kurtit, alternativë duket se janë zgjedhjet, sepse siç ka thënë në këtë takim para bashkatdhetarëve, as opozita nuk ka vullnet e as synim për qeveri të tyre.

“Do të përpiqemi maksimalisht deri ditën e diele. Prandaj, në këto ditët e mbetura jemi duke komunikuar, duke biseduar. Nuk është kollaj, se s’di si me ua shpjeguar. Është e intoksikuar atmosfera shumë. Ka shumë xhelozi, inat e cinizëm, shumë më shumë se ide punë e pasion, por jemi ku jemi tash këtu dhe do të përpiqemi që ta bëjmë qeverinë, përndryshe siç po duket alternativa, do të shkojmë në zgjedhje prapë. Ose do ta bëjmë ne qeverinë ose do të shkojmë në zgjedhje. Nuk po duket që opozita ka vullnet dhe as synim për qeveri të tyre,” tha përmes rrjetit social Faceboo kryeministri në detyrë i Kosovës në Londër, pas takimit me diasporën kosovare.

Takimi me bashkatdhetarët është organizuar nga Ambasada e Kosovës në Londër, të cilët i kishin ftuar kosovarët atje për bashkëbisedim të hapur me kreun në detyrë të qeverisë.

Vetë Albin Kurti, më herët shkroi se sa herë e takon diasporën bashkëbisedimi me ta është i hapur e produktiv.

“Kësaj radhe, takimin me mërgimtarët e patëm mbrëmë në Mbretërinë e Bashkuar, në Londër, atje ku të mërkurën do të mbahen punimet e Samitit të radhës të Procesit të Berlinit. Mërgimtarët tanë na përfaqësojnë denjësisht anekënd botës. Bashkë diskutuam për partneritetin Kosovë-Mbretëri e Bashkuar, fuqizimin e lidhjeve mes dy shteteve dhe diasporën si urë që e forcon këtë marrëdhënie,” u shpreh në Londër kryeministri në detyrë, duke përfunduar:

“Nuk munguan as bisedat mbi zhvillimin dhe progresin e Kosovës, teksa i informova për arritjet e sukseset e qeverisë sonë dhe objektivat për mandatin tonë të ardhshëm!”