Albin Kurti në Sarajevë, ministrat serb bojkotojnë mbledhjen e qeverisë Bosnje Hercegovinës
Ministrat nga Republika Srpska nuk do të marrin pjesë sot në mbledhjen e Këshillit të Ministrave të Bosnje Hercegovinës, BeH, për shkak të vizitës së Kryeministrit të Kosovës, Albin Kurti, në Sarajevë.
Këtë vendim e ka bërë të ditur Zv/Kryetari i Këshillit të Ministrave, Stasha Kosharac, raporton agjencia Srna, duke shtuar se vendimi është marrë pas konsultimeve në kabinetin e tij, ku morën pjesë ministri i Financave në Këshillin e Ministrave, Srdjan Amixhiq, Zv/Ministri i Mbrojtjes, Aleksandar Goganoviç, Zv/Ministrja e Çështjeve Civile, Marijana Mujiç, dhe Zv/Ministri i Komunikacionit dhe Transportit, Ognjen Janjiç.
Kryetari i entitetit serb të Bosnje Hercegovinës, Republika Srpska, Milorad Dodik, tha se ardhja e Albin Kurtit në Sarajevë do ta komplikojë situatën në Bosnje Hercegovinë.
“BeH nuk e ka njohur Kosovën. Ne nuk do të lejojmë që shqiptarët nga ai rajon të hyjnë me letërnjoftim,” tha Dodik, sipas raportimit të Agjencisë Srna.
Bosnje Hercegovina dhe Kosova nuk e kanë njohur njëra-tjetrën për shkak të kundërshtimit të Republikës Srpska, në krye të së cilës është Milorad Dodik, i cili ka orientim prorus dhe është i sanksionuar nga Shtetet e Bashkuara për minimin e Marrëveshjes së Daytonit.
Gjatë samitit të Procesit të Berlinit në muajin tetor, Albin Kurti është shprehur se Kosova nga 1 janari 2025 do t’i lejojë qytetarët e Bosnje Hercegovinës të hyjnë me letërnjoftim.
Marrëveshja që do të hiqte regjimin e vizave midis Kosovës dhe Bosnje Hercegovinës dhe do t’u mundësonte qytetarëve të këtyre dy vendeve të udhëtojnë pa viza, ende nuk është ratifikuar në Parlamentin e Bosnje Hercegovinës. Ajo po bllokohet nga përfaqësuesit e Republikës Srpska, të udhëhequr nga Lidhja e Socialdemokratëve të Pavarur e Milorad Dodikut.
Ndryshe, Kryeministri i Kosovës, Albin Kurti, sot në Sarajevë do të marrë pjesë në një konferencë të organizatës joqeveritare “Asociacioni i Intelektualëve të Pavarur Krug 99”. Udhëheqësi i kësaj organizate, Adil Kulenoviç, ka saktësuar se Kryeministri i Kosovës do të mbajë një fjalim në këtë konferencë, ku do të diskutohet për marrëdhëniet rajonale.
