Albin Kurti në Stan Tërg, paralajmëron shkarkime të reja

Kryeministri i Kosovës, Albin Kurti, dhe Kryetarja e Parlamentit, Vjosa Osmani, janë pritur sot me protesta në minierën e Trepçës në Stan Tërg.

Para protestuesve, Kryeministri Kurti tha se ashtu siç veproi me Bordin e Telekomit, do të veprojë edhe me të tjerët ndërsa premtoi se kërkesat e tyre do të merren parasysh.

“Dje shkarkuam bordin e Telekomit dhe do të vazhdojmë edhe me bordet e tjera por që na duhet kohë të veprojnë pasi jemi vetëm në javën e dytë të qeverisjes,” tha Kurti.

Arsim Musa, nga këshilli organizativ i protestës, kërkoi nga kryeministri Kurti që të shkarkoi edhe Bordin e Trepçës, pasi që sipas tij kanë bërë shkelje në konkursin e fundit, duke punësuar familajrë.

“Kërkoj nga kryeministri Kurti të shkarkoj bordin udhëheqës pasi në konkursin e fundit janë punësuar njerëz me lidhje familjare direkt me këtë bord,” tha Musa.

Protesta u shpërnda e qetë dhe Kryeministri Albin Kurti u premtoi se do t’i takojë në zyrën e tij për të analizuar më shumë këtë çështje.

Kjo nuk është hera e parë që këta minatorë po protestojnë, ata edhe ditë më parë kanë kërkuar shkarkimin e bordit të kësaj ndërmarrje.