Albin Kurti në Vushtrri: S’kemi ardhë me lyp vota por energji!
Kandidati për Kryeministër, Albin Kurti, tha në Vushtrri se nuk janë aty për me kërku vota por energji sepse e gjithë Vushtrria është Vetëvendosje.
“Në Vushtrri nuk kemi ardh me lyp vota, por me lyp energji se Vushtrria ka qenë lëvizje ka qenë Vetëvendosje edhe para se të formohet Lëvizja Vetëvendosje. Nga sot kanë mbetur edhe tri ditë deri te ndryshimi historik. Sa më shumë që po ia afrohemi ditës dhe kutisë së votimit aq më të tërbuar po bëhen kundërshtarët tanë.”
Zhurma e atyre që nuk e duan ndryshimin, tha Albin Kurti, po rritet.
“Por ata po harrojnë se populli ynë as nuk blihet as nuk shitet. Ata po e ndjejnë rënien e tyre e ngritjen tonë. Ajo që ka qenë e pamundur tash është e pashmangshme”.
Këtë të diel mbaron epoka 20 vjeçare e krimit dhe korrupsionit, tha Kandidati për Kryeministër i Lëvizjes Vetëvendosje, dhe fillon epoka e zhvillimit dhe përparimit. Dhe derisa ai po vazhdonte me fjalimin në skenë janë futur një grup i bashkatdhetarëve të cilët në duar mbanin slloganin “Mërgata me Lëvizjen Vetëvendosje” ndërsa Albin Kurti u shpreh:
“Mërgata janë mendja, zemra dhe shpëtimi ynë. Kjo mërgatë na i mbanë gjallë familjet tona dhe paqen tonë sociale. Ju uroj rrugëtim të mbarë e të sigurt për në atdhe e të ju them mirëserdhët në shtëpinë tuaj – vendlindjen tuaj të dashur”, ka thënë Kurti.
Ndërsa në sallën e sporteve në Vushtri bëheshin thirrje “Shqipëri etnike” dhe valëvitej flamuri shtetëror i Kosovës, Kurti ka bërë thirrje që ata që kanë qenë në pushtet deri sot të ndëshkohen në ditën e zgjedhjeve.
“Gënjeshtra është sikur kredia: “Kënaqu sot e paguaj nesër”. Këta të tjerët kanë gënjyer sa kanë mundur. Më 6 tetor bëni që të paguajnë shtrenjtë duke e votuar Lëvizjen Vetëvendosje,” tha Kandidati për Kryeministër i Lëvizjes Vetëvendosje, Albin Kurti.
