Albin Kurti nga Gjakova: Krim mbi krimin, mosdënimi i kriminelëve serbë!

Kandidati për Kryeministër i Lëvizjes Vetëvendosje, Albin Kurti, tha sot në Gjakovë se krim mbi krimin është mungesa e drejtësisë për krimin, mungesa e dënimit të kriminelëve serbë ndërsa u zotua se qeveria e tij do t’i shpallë luftë varfërisë

“Ne nuk i kemi asgjë borxh Serbisë, por ajo na ka borxh neve. Më së paku duke të rikujtoj plagët e hapura, por një ndër përgjegjësitë e prioritetet kryesore të mijat si kryeministër, do të jetë qe të shërojmë ketë plagë të hapur për të gjithë shoqërinë. Duhet të shtohet numri i prokurorëve special që merren me krimet e luftës dhe përkrahje profesionale dhe financiare për ta. Është krim mbi krimin mungesa e drejtësisë për krimin, mungesa e dënimit të kriminelëve serbë.”

Erdhi dita, tha Albin Kurti, të heqim të paditurit nga qeveri:

“Na besoni neve, sepse ne nuk lëshojmë pe për ju, kurse të tjerëve besoni ju ka humb edhe lëmshi. Erdhi dita që në Kosovë e në Gjakovë të kthehet sytë nga arsim. Ka ardhur dita të heqim të paditurit nga qeveria, e të kthejmë diturinë në shkolla të rishikojmë tekstet shkollore dhe të avancojmë arsimin parauniversitar. Të reformojmë shkollat profesionale, e të zvogëlojmë hendekun mes dijës së fituar dhe kërkesave të tregut. Duam edukim cilësor për të gjithë pa marrë parasysh sa para kanë njerëzit e nga vinë ata, erdhi dita për dije dhe shkencë.”

Në fund, Kandidati për Kryeministër i Lëvizjes Vetëvendosje, Albin Kurti, premtoi se Teatri i qytetit të Gjakovës do të ketë buxhet të sigurt, do ta funksionalizoi zonën ekonomike si dhe do ta bëjë realitet Aeroportin e Gjakovës.