Albin Kurti: Nga Gjykata Kushtetuese presim vetëm interpretim!
Kryeministri në detyrë i Kosovës, Albin Kurti, u shprehë qartë se nga Gjykata Kushtetuese pret një vendim bazuar në Nenin 112, pra, vetëm ta interpretojë Dekretin e Presidentit.
“Nga Gjykata Kushtetuese pres vendim në përputhje me Nenin 112 të Kushtetutës. Gjykata Kushtetuese duhet të bëjë interpretim të Kushtetutës e jo shkruaj. As presidenti, as Kushtetuesja s’mund ta shkruajnë Kushtetutën, pra Gjykata vetëm duhet ta interpretojë atë,” tha Kryeministri Kurti ndërsa për deklaratat e presidentit Hashim Thaçi shtoi:
“Çfarë ka thënë presidenti për mua, mua më duket se dëshirat e tij i përshkruan si fakte të mia. Unë jam kryeministër në detyrë s’bëhet fjalë për përshkrime që më ka bërë ai.”
Ndryshe, më 25 mars, Parlamenti i Kosovës ka miratuar mocionin e mosbesimit ndaj Qeverisë Kurti. Pas këtij mocioni, Kryetari i LDK, Isa Mustafa në dakordësi të plotë me Presidentin e Kosovës, Hashim Thaçi, nga ky i fundit mori më 30 prill edhe Dekretin i cili e nominon Avduallah Hotin nga Lidhja Demokratike e Kosovës për kryeministër të ri të Kosovës.
Pa humbur kohë, po këtë ditë Lëvizja Vetëvendsje e ka dorëzuar në Gjykatën Kushtetuese kërkesën për vlerësimin e vendimit të Hashim Thaçit.
Më 1 Maj, Gjykata Kushtetuese vendosi pezullimin e përkohshme të zbatimit të këtij Dekreti deri më 29 maj, kur pritet të merret vendim për ligjshmërinë e këtij vendimi.
