Albin Kurti nuk merr pjesë në takimin e 11 majit në Bruksel

Kryeministri i Kosovës, Albin Kurti, tha sot në Bruksel se nuk do të marrë pjesë në takimin 11 majit në kuadër të dialogut Kosovë-Serbi, të paralajmëruar nga Përfaqësuesi i Lartë për Politikë të Jashtme dhe Siguri pranë BE, Josep Borrell.

“Unë nuk mund të marr pjesë në takim për të cilin nuk e kam konfirmuar paraprakisht pjesëmarrjen, ajo që mund të ju konfirmoj është që do të vij në Bruksel për një drekë ose darkë pune të organizuar nga Komisionari Borrell, nga mesi i muajit maj, ku do të bëjnë pjesë liderët e Ballkanit Perëndimor,” tha Kurti ndërsa nisi sot takimet zyrtare në Bruksel, në udhëtimin e tij të parë prej se mori mandatin në krye të Qeverisë pas zgjedhjeve të 14 shkurtit.

Albin Kurti së pari zhvilloi një takim me kryeministrin e Belgjikës, Aleksandar De Croo, për të vazhduar më pas me takimet në Komisionin Evropian.

Kryeministri i Belgjikës, Alexander De Croo, tha se ka pasur një takim të mirë me Kurtin ku ka diskutuar për agjendën e reformave në gjyqësorin e Kosovës, rimëkëmbjen ekonomike, procesin e vaksinimit, si dhe për aspektin evropian dhe atë trans-atlantik.

Kryeministri belg De Croo u shpreh gjithashtu se gjatë këtij takimi, e ka ripërsëritur mbështetjen e fuqishme të shtetit të tij për dialogun ndërmjet Kosovës dhe Serbisë, që lehtësohet nga BE-ja.

Kryeministri Kurti është i shoqëruar nga ministrja për Punë të Jashtme, Donika Gërvalla-Schwartz, dhe ministri për Çështje Evropiane dhe Dialog, Besnik Bislimi. Ky i fundit ka arritur në Bruksel dje ku ka pasur dhe një takim joformal me Përfaqësuesin e posaçëm të Bashkimit Evropian për dialog Mirosllav Lajçak.

Ndryshe, Kurti pritet që të takohet sot edhe me Komisionerin evropian për Bujqësi dhe Zhvillim rural Janusz Wojciechhowski, atë për Drejtësi Didier Reynders, Komisioneren për Energji Kadri Simons, për Ekonomi dhe Financa Paolo Gentiloni, nënkryetarin ekzekutiv të Komisionit Evropian për Ekonomi Valdis Dombrovskis, si dhe Presidentin e Parlamentit Evropian David Sasolli.

Nesër, Kryeministri i Kosovës, Albin Kurti, do të ketë takime me presidenten e Komisionit Evropian Ursula von der Leyen dhe me Përfaqësuesin e Lartë për Politikë të Jashtme dhe Siguri, Josep Borrell.

Kurti takimin me Presidentin e Këshillit Evropian Charles Michel e ka zhvilluar në mënyrë virtuale të martën pasi ai është dashur të shkojë në një udhëtim jashtë shtetit me urgjencë.

Kurti do të ketë takim gjatë vizitës në Bruksel edhe me Sekretarin e Përgjithshëm të NATO-s Jens Stoltenberg.

Bashkëpunimi i Kosovës me Komisionin Evropian në fushat e bujqësisë, zhvillimit rural, energjisë, ekonomisë dhe financave vlerësohet si mundësi për të nxitur investime dhe përmirësuar jetën e qytetarëve. Kosova, sipas raporteve të progresit të Komisionit Evropian, në shumë prej këtyre fushave ka ngecje të mëdha dhe BE pret që Qeveria të ketë më shumë vëmendje për të shënuar progres. Vëmendja më e madhe megjithatë pritet të jetë për temat siç janë ndihma në procesin e vaksinimit, ku Kosova ka problem serioze me sigurimin e vaksinave deri tash dhe BE planifikon të ndihmojë, sikur edhe në përgatitjet për vazhdimin e dialogut mes Kosovës dhe Serbisë.

Në mbrëmje Kurti do të ketë edhe një darkë me Përfaqësuesin e Posaçëm të BE-së për dialogun Kosovë-Serbi, Miroslav Lajçak.

Në fillim të kësaj jave, zyrtarët e lartë të BE-së për vazhdimin e dialogut kanë biseduar edhe me presidentin Serbisë Aleksandar Vuçiç, ku Përfaqësuesi i lartë Josep Borrell ka përmendur edhe datën e 11 majit si ditë e caktuar për takimin Kurti-Vuçiq.

Qeveria e Kosovës ka mohuar se është dakorduar një datë e tillë.

Ndërkohë në BE kanë sqaruar se ajo është vetëm një “datë e mundshme” dhe se “po punohet për të caktuar një datë për takimin e tyre”./RFE/