Albin Kurti: Regjimi autokratik në Serbi është nxitur nga pushtimi i Ukrainës!
Regjimi autokratik në Serbi është nxitur nga pushtimi i Ukrainës nga ana e Rusisë, tha Kryeministri i Kosovës, Albin Kurti, në konferencën ”Urëzimi i Ballkanit Perëndimor: Diplomacia Parlamentare për Sigurinë Rajonale dhe Integrimin Euro-Atlantik” teksa ka folur për diplomacinë.
“Në rajonin tonë shohim se si regjimi autokratik në Serbi është nxitur nga pushtimi i Ukrainës nga ana e Rusisë. Në dy vitet e para të qeverisjes sonë, ata kanë sjellë katër herë ushtrinë te kufiri ynë, kanë sponsorizuar terrorizmin, kanë shpërndarë gënjeshtra dhe narrativa të rrejshme për të përligjur veprat e tyre ndaj Kosovës dhe rajonit,” tha Albin Kurti duek theksuar se BE dhe NATO iu përgjigjën drejt pushtimit rus të Ukrainës duke pranuar në aleancë Finlandën dhe Suedinë dhe duke i dhënë statusin e vendit kandidat Ukrainës, Moldavisë dhe Gjeorgjisë.
“Kërcënimet e sigurisë në Ballkanin Perëndimor nga Serbia duhet të trajtohen duke përdorur të njëjtën qasje, pra duke i dhënë Kosovës statusin e vendit kandidat për Bashkimin Evropian dhe anëtarësimin në Këshillin e Evropës,” tha Kurti duke e quajtur superioritetin e një grupi ndaj tjetrit si steriotip të vjetër, teksa ka bërë thirrje për dialog dhe gjithpërfshirje ndërsa përfundoi:
“Ka ende historikisht dallime politike dhe pabarazi socioekonomike, të cilat kërcënojnë të na ndajnë në vend që të bashkohen. Kjo është arsyeja pse duhet të promovojmë principet e dialogut dhe gjithpërfshirjes, të cilat janë esenciale për të krijuar ura ndërmjet njerëzve dhe shteteve.”
Ndërsa Kryetari i Parlamentit të Kosovës, Glauk Konjufca, tha se vet shtetësia e vendit ka kaluar në procese diplomatike.
“Vetkrijimi i shtetit të Kosovës ka marrë shumë përpjekje diplomatike dhe ka kaluar në shumë faza të trajtimit diplomatik,” tha Glauk Konjufca duke theksuar disa nga trupat e rëndësishme evropiane, pjesë e së cilave është Parlamenti i Kosovës.
“Ne po punojmë që përmes bashkëpunimit me donatorët ndërkombëtare brenda Kuvendit t’i forcojmë kapacitetet e deputetëve dhe stafit parlamentar mbështetës, sa i përket forcimit të bashkëpunimit ndërparlamentar me shërbimet homologe të vendeve të rajonit dhe më gjerë,” tha Kryetari i Parlamentit të Kosovës, Glauk Konjufca.
Ndryshe, konferenca ”Urëzimi i Ballkanit Perëndimor: Diplomacia Parlamentare për Sigurinë Rajonale dhe Integrimin Euro-Atlantik” që po zhvillohet në Prishtinë, është organizuar nga Komisioni për Punë të Jashtme dhe Diasporë, me mbështetje të organizatës Friedrich-Ebert-Stiftung Kosovo Office, FES.
